ЦИВИЛ одржа јавен настан со презентацијата на Финалниот извештај, анализи и препораки што произлегуваат од изборниот мониторинг на ЦИВИЛ „Локални избори 2021: Научени лекции“ и со излагања од Претседателката на ДКСК, Билјана Ивановска и членот на ДИК, Борис Кондарко.
„За состојбата во која се наоѓа општеството и политичкиот систем во целост, заслужни се тешките пропусти направени во креирањето на изборниот систем, а уште повеќе во изборните практики. Самите изборни процеси не се изолирани од сè останато во општествено-политичкото и правниот поредок. Напротив, тие се истовремено и последица и причинител за позитивните или негативните состојби во целокупното живеење на едно општество и на државата.“, вели Џабир Дерала, на почетокот на презентацијата на анализата и препораките што произлегуваат од изборниот мониторинг на ЦИВИЛ за Локалните избори 2021, на настанот на ЦИВИЛ „Локални избори: Научени Лекции“.
„Како што знаете, согласно нашиот закон, треба да го следиме изборниот процес и да ја следиме кампањата односно финансирањето на изборната кампања. За таа цел, државната комисија имаше поддршка од ИФЕС, и организираше конкурс на кој се пријавија околу 17 до 20 набљудувачи. Имаме и аналитичари кои во моментов работат на анализа на прибраните податоци. Од друга страна се организиравме добро да ги следиме изборните сметки на политичките партии за тоа кои име се донатори, за таа цел добивме пристап до банкарските сметки, на дневна основа, и го следевме секој прилив на нивните сметки. Бевме електронски поврзани со бирото за вработување, како и министерството за труд и социјална политика, со цел да го избегнеме ризикот некои невработени или социјално загрозени лица, да се најдат на листата на донатори, како што впрочем бевме сведоци во изминатите години. Исто така, соработуваме со другите институции, како што е управата за финансиско разузнавање, коишто го следат текот на парите, а ќе видиме што ќе произлезе од сето тоа“,вели меѓу другото претседателката на ДКСК, Биљана Ивановска.
Борис Кондарко од Државната изборна комисија (ДИК), Борис Кондарко истакна дека не се согласува со формулацијата „нефункционирање“ на фингерпринт апаратите, бидејќи од 3.480 избирачки места, само во 6 избирачки места не работеа фингерпринт апаратите поради технички причини.
Амбасадорката на ОДИХР во извештајот изнесе дека гласањето се одвиваше глатко, така што сметам дека немаше никаков проблем при гласањето со употреба на фингерпринт апаратите. Ако не беа функционални во првиот круг, тогаш ќе немавме резултати и немаше да се одржи вториот круг“, истакна Кондарко.
Тој делумно се согласува со тоа што во публикацијата на ЦИВИЛ „Локални избори: Научени лекции“ пишува за „неподготвеноста на изборната администрација“, додавајќи дека токму ДИК спроведе неколку интерактивни обуки до 30 лица од страна на нивните 120 сертифицирани обучувачи.
Публикацијата „Локални избори: Научени лекции“ во која се објавени извештаи, анализи, коментари и препораки на ЦИВИЛ, што произлегуваат од долгорочниот и краткорочниот мониторинг на политичките и изборните процеси, сега е достапна и онлајн. Публикацијата е на сто страници и е само прва од четирите кои се однесуваат на спроведувањето на Локалните избори 2021.
Дијана Тахири, Дехран Муратов
Камера: Атанас Петровски
Реализација и монтажа: Ариан Мехмети
