„Во услови на сеопшти напади за разграбување на македонската државност ги повикуваме сите Македонци и пријатели на македонскиот народ, на секое место, низ разни облици на граѓанска непослушност, да го одбраниме својот дом и да ја одбраниме скапо платената македонска државност“, стои во прогласот на неколку македонски патриотски здруженија кои најавија „8-ми Коложег 2018 година“ (август).
Кампањата на граѓанска непослушност и морално жигосување ќе се води против внатрешните сили, како што се: партии, организации и поединци кои вршат дејства во спроведување на плановите за разнебитување на македонската нација. Тие не ги признаваат за легитимни Собранието, Владата и судството на Република Македонија, како што велат – се додека управувањето со Македонија не му се врати на нејзиниот легитимен историски носител – македонскиот народ.
„Сите оние кои во таканареченото Собрание ќе гласаат за навестените антимакедонски закони ќе бидат сметани за непријатели на македонскиот народ. Посебно родените како Македонци кои ќе гласаат за законите како: Законот за јазиците со кој се воведува франкештајнска досега невидена двонационална држава. Договорот за добрососедство со Република Бугарија со кој македонската историја, а со тоа и македонската нација се третираат како бугарски. Планот 3-6-9 со кој се напаѓаат моралот и здравата духовна култура на македонскиот народ. И на крај договарањата за името со кој македонското име во меѓународните односи му се предаваат во сопственост на јужниот сосед“, стои во повикот.
Сите пратеници кои ќе учествуваат во гласањето на антимакедонски закони ќе бидат сметани како изроди од македонскиот народ.
„Тие и нивните нечесни семејства, нечесни родители и нечесно потомство секаде ќе бидат подложени на третман како одродници. Одродници кои во услови кога се работи за живот и смрт не се обѕрнале на тешката состојба кај сопствениот сиромашен народ, туку им се приклучиле на ударите врз народот насочувани од надворешните непријатели. Сите пратеници по име и презиме ќе бидат наведени и од моментот на гласање ќе го носат Јудиниот белег. Кога Македонија ќе му биде вратена на македонскиот народ, секој од нив ќе одговара за својот придонес во велепредавството“, истакнуваат иницијаторите.
Патриотските здруженија го повикуваат секој Македонец и сите пријатели на Македонците да прекинат било какво деловно или приватно општење со личностите и организациите кои учествуваат во предавничките договорања.
„Не ги послушавте нашите предупредувачки зборови и зборовите завршија, започнуваат делата. Во иднина, наредните денови, недели, месеци, сѐ додека Македонија не му се врати на македонскиот народ, на пошироката јавност ќе и бидат давани насоки за начините на изразување на граѓанската непослушност“, се наведува во кампањата кои заеднички здружено ја активираат: „Тврдокорни“, Македонски Обединети Сили (МОС), Движењето Преродба и Светски македонски конгрес.
Д.М.
