Премиерот Зоран Заев вчера одржа состанок преку видео конференциска врска со неговиот албански колега Еди Рама и претседателот на Србија, Александар Вучиќ, на кој е реафирмирана иницијативата за подобрување на напредната регионална соработка во рамки на Берлиснкиот пероцес, започната минатата година.
Кабинетот на Вучиќ соопшти дека на средбата е констатирано оти иницијативата е целосно во согласност со Берлинскиот процес и дека претставува добра основа за претстојниот Самит на лидери на Западен Балкан, што ќе се одржи во Софија, јавува МИА.
Активностите на иницијативата за подобрување на регионалната соработка беа одложени заради пандемијата КОВИД-19, како и заради изборите одржани во Северна Македонија и Србија.
– Тројцата лидери се согласија дека кризата дополнително ја истакна потребата од интензивирање на соработката и регионалната економска интеграција, потенцирајќи дека е исклучително важно за западнобалканската шесторка дополнително да се вклучи во подобрувањето на регионалната соработка и затоа ја повикаа Приштина да се приклучи на иницијативата, се наведува во соопштението.
Поканата уследи по воспоставувањето на рамката дефинирана во Вашингтон во септември оваа година помеѓу претседателот на Србија, Александар Вучиќ и премиерот на Косово, Авдулах Хоти.
– Претседателот Вучиќ и премиерите Рама и Заев, се согласија да формираат постојана работна група што ќе вклучува официјални претставници на владите на секоја од земјите учеснички, со цел да се забрза процесот на потпишување и спроведување на договорените активности во рамките на иницијативата за подобрување на регионалната соработка, се додава во соопштението.
Учесниците на состанокот се согласиле дека оваа иницијатива може да се искористи и за идентификување на заеднички инфраструктурни проекти насочени кон развој на регионот, во согласност со Економско-инвестицискиот пакет на ЕУ за земјите од Западен Балкан.
Тројцата лидери изразиле надеж дека и владите на Црна Гора и Босна и Херцеговина наскоро ќе можат да се приклучат на оваа иницијатива, со што ќе се постигне подобра економска соработка меѓу сите земји во регионот, што ќе резултира со зголемување на слободите, трговската размена и подобрување на животниот стандард за сите луѓе регионот.
Српскиот министер за финансии Синиша Мали, кој со Вучиќ учествуваше на трилатералниот состанок со премиерите Заев и Рама, изјави дека одлуките донесени денеска се многу важни за сите земји во регионот, со порака дека иницијативата за напредната регионална соработка во рамки на Берлинскиот процес е иднината на регионот и дава основа за економски развој на регионот и секоја земја одделно.
Тој посочи дека е договорено потпишување на Договор за подобрување на царинската политика за поедноставување на царинските постапки, со што камионите непречено ќе ги преминуваат границите, без да чекаат неколку часа. – Сето ова ќе придонесе за развој на економијата на целиот регион и директно за развој и раст на животниот стандард на сите граѓани во регионот, изјави Мали.
– Ова се важни договори. Замислете како ќе изгледа овој регион кога ќе ја преминете границата само со лична карта и ќе стигнете до Албанија, Северна Македонија или некоја друга земја што наскоро ќе се приклучи на оваа иницијатива, изјави Мали.
Тој нагласи дека во рамки на оваа иницијатива ќе се направи список на заеднички инфраструктурни проекти кои понатаму треба да придонесат за подобрување на квалитетот на инфраструктурата и економскиот развој на регионот.
Мали потсети дека на 10 ноември се очекува потпишување на договорите и дека сликата ќе биде сосема поинаква на 11 ноември, кога ќе започне реализацијата на договореното, нагласувајќи дека напредната регионална соработка во рамки на Берлинскиот процес претставува иднина за Западниот Балкан и основа за економски развој на целиот регион и на секоја земја одделно.