ВЕСТ НА ДЕНОТ
Бектеши: Сигурно ќе има намалување на цената на електричната енергија за малите потрошувачи
Ќе направиме се што е во наша надлежност да нема драстично зголемување на цената на електричната енергија за домаќинствата, а ќе има намалување за малите потрошувачи – за микро и малите компании, посочи денеска министерот за економија, Крешник Бектеши.
-Намалување на цената за малите потрошувачи ќе има заради тоа што веќе се стабилизираат цените за електрична енергија и за природен гас на светските берзи. Тоа дозволува ние да можеме да интервенираме за да бидат поконкурентни нашите микро и мали компании не само на нашиот пазар, туку и во регионот и пошироко, рече Бектеши во одговор на прашање пред почетокот на одбележувањето на јубилејот „90 години Занаетчиска комора Скопје“.
ИЗЈАВИ НА ДЕНОТ
„Медиумскиот пејсаж во Северна Македонија е прилично комплициран. Не мислам дека сме исклучок од другите земји, каде демократијата се соочува со повеќе предизвици. Би рекол дека на Балканот, поточно, во земјите од Западен Балкан, медиумите се пред сé сиромашни. Новинарството како професија не е повеќе популарно. Има сé помалку студенти кои се запишуваат да студираат новинарство. Последната бројка, мислам е дека не повеќе од 15 студенти се запишале на новинарски студии во Северна Македонија изминатата година“, вели Џабир Дерала, претседател на ЦИВИЛ, во интервју за Катерина Соколова, од Институтот за новинарство во Кијив, Украина, по повод меѓународниот семинар „Отпорно новинарство во борба против дезинформациите и пропагандата“ во организација на ЦИВИЛ во партнерство со Youth4Media (Y4M).
*
Министерката за одбрана, Славјанка Петровска, ги повтори изјавите дека во моментов и покрај честите закани за поставени бомби во јавни и образовни институции, нема реална закана по безбедносната состојба во земјава. Таа во одговор на новинарско прашање за ЦИВИЛ медиа рече дека Министерството за одбрана нема официјални надлежности во врска до хибридните напади и заканите со бомби, но дека се подготвени по потреба да помогнат.
Деновиве во јавноста се појави анкета на Центарот за анкетни истражувања на Меѓународниот републикански институт (ИРИ) за Северна Македонија која се занимаваше со прашања поврзани со рејтингот на партиите, расположението на граѓаните за евроинтеграции, како и многу други прашања. ЦИВИЛ Медиа разговараше со граѓаните во Скопје, кои на прашањето дали им веруваат на анкетите на агенциите, или поточно дали биле анкетирани, тие одговорија дека со скептицизам гледаат на анкетите и дека зависи од тоа кој ги нарачува.
ФЛЕШ ВЕСТИ
ПОЛИТИКА Најважниот предмет, или меѓу најважните, е тој со незаконското прислушување. И ако не се испорача казна, тогаш останува ризикот и други луѓе во иднина да го прават истото злосторство како што тоа го направиле Груевски и Мијалков. Затоа казна мора да има за секое незаконско дело, вели поранешниот премиер Зоран Заев во изјава за „Фокус“.
-Животот на моите деца, семејството и пријателите беше под прашање, но и покрај тоа, во име на заштита на човековите права, во име на вистината, демократијата и слободата, и за никогаш да не се повтори, јавно беа, лично од мене, споделени доказите за незаконското прислушување, додава тој.
ФИНАНСИСКА ПОМОШ Владата подмири речиси половина од долгот за струја на македонски Железници и Транспорт. Двесте милиони денари се ставени на располагање на Министерството за транспорт и врски за плаќање на дел од долгот на Железници и Транспорт, пренесува МИА.
БУЏЕТ Предложениот буџетот на Министерството за одбрана за 2023 година изнесува 274,6 милиони евра и е за една третина повеќе од минатогодишниот. Според премиерот Димитар Ковачевски, планираните финансии за одбраната за следната година ќе придонесат за развој и модернизирање на овој ресор согласно стандардите на земја членка на НАТО.
ПРАВДА Кабинетот на вицепремиерката за добро владеење, Славица Грковска, досега иницирал три постапки поврзани со злоупотреби од страна на функционери. Во интервју за МИА, вицепремиерката Грковска потенцира дека за две постои основано сомнение за поднесувањето кривична пријава, додека третиот случај е поднесен пред извесно време и станува збор за голем и обемен случај, поради што не очекува до крајот на годината да има исход од страна на истражните органи.
ВОЈНА ВО УКРАИНА
Володимир Зеленски, украинскиот лидер, се очекува денеска да се сретне со претседателот Бајден во Белата куќа, а потоа лично да се обрати во Конгресот, пренесува Њу Јорк Тајмс повикувајќи се на персоналот запознаен со планирањето кои предупредија дека плановите може да се променат. Ризиците од таква посета се високи, а строга тајност го опкружувала секој таков напор.
РЕГИОН
(ИЗБОР) Албански медиуми: Косовско-српски „нон –пејпер“ за формирање Заедница на српски општини, корупциска шема Брезовица, Албанија купи три беспилотни вооружени летала од „Бајрактар“
СЛОБОДНА ЗОНА
„И за некое чудо или сепак не, вкупните резултати од 64 земји покажуваат, дека колективниот Запад (ЕУ и САД) останува попривлечен како економски (58%) така и како партнер во безбедноста (59%). За споредба, Кина и Русија заедно добиле 29% поддршка како економски, и 26% како безбедносен партнер.
Ако е така, тогаш зошто ВМРО-ДПМНЕ им го пречи патот на граѓаните кон ЕУ, измислувајќи сто причини за да им го оневозможат бенефитот на сопствените граѓани за кои постојано велат дека се грижат.
Оваа лажна грижа на опозицијата мора да престане, токму во интерес на граѓаните на кои повеќе од сè им е потребен политички и особено економски просперитет што ЕУ им го овозможува“, пишува Љубиша Николовски во анализата „Ако ЕУ е најпосакуван партнер на македонските граѓани, зошто ВМРО-ДПМНЕ е против нивната волја“.
Д. Муратов
