„Овие денови сме преплавени со понуди и повици од граѓани кои се заинтересирани да се приклучат и да бидат дел од оваа иницијатива, и сакаат на некој начин да придонесат за нејзината успешна реализација“, вели Цветин Чилиманов, еден од тројцата иницијатори на „Стоп Операција Сорос“.
Од СОС бараат одговор од Амбасадата на САД и од Kанцеларијата на УСАИД во Македонија, на кој начин соработуваат и ја финансираат Фондацијата „Oтворено општество Македонија“.
„На социјалните мрежи, во текот на овие денови ќе ги информираме и граѓаните како можат конкретно да испратат информации, свои забелешки, поплаки и коментари, како во Македонија, така и во Вашингтон, до луѓето кои ги распределуваат овие средства и да им кажат дека Македонија го цени стратешкото пријателство со САД, но изминатиот период на некој начин тоа беше киднапирано од една група идеологизирани лица од двете држави“, изјави Чилиманов.
За процесот на „десороизација“, како основна активност на здружението, пишува и професорката Мирјана Најчевска, како дел од анализата објавена од Сервис за проверка на факти од медиумите.
„Еден од наједноставните начини за фокусирање на перцепцијата на јавноста на еден дел од сликата и оневозможување на јавноста да ги согледа сите параметри на одредено случување (особено, кога станува збор за ситуации во кои се прекршуваат законите и се повредуваат правата на луѓето) е употребата на еден или два збора со кои се покрива една многу посложена ситуација. Таков е примерот со актуелната употреба на зборот ‘Сорос’. Навидум, станува збор за информирање за активностите на еден човек, Џорџ Сорос (и групи луѓе кои се финансирани од Сорос), меѓутоа, доколку се погледне широката лепеза на употребата на зборот во медиумското информирање, фактички, станува очигледно дека со овој збор се врши фокусирање на перцепцијата на јавноста во една точка, со цел дефокусирање од вистински важното: една голема повреда на основното право на давање и на примање информации, на мислење и на изразување“, пишува Најчевска.
Со реакција за нападот на граѓанското општество во Македонија, се огласи и Иво Вајгл, известувачот за Македонија, од групата на либерали во Европскиот парламент.
Но, Вајгл предлага ЕП да покаже загриженост „за радикалните и неоправдани јавни напади на граѓанските организации и странските претставници од политичарите и медиумите“ во Македонија. Во однос на ова, се забележува „ограничена улога на Владата и посветеност и недоволната соработка со граѓанските организации на сите нивоа“. Па, така, со Предлог-резолуцијата се повикуваат надлежните органи да ги вклучат граѓанските организации во креирањето политика на редовен и структуриран начин.
