Специјалното јавно обвинителство се откажува од обвинителниот акт за предметот „Пуч“. Обвинителството најави дека во текот на денот ќе го достави поднесокот до Основниот суд – Скопје 1.
„Обвинителството се откажа од обвинителниот акт, затоа што фактичката состојба прикажана во обвинителниот акт е во спротивност со доказите со кои ова Јавно обвинителство располага и со наодите во истражните постапки: ‘Таргет’ и ‘Тврдина’. Ваквата наша одлука е со цел да се приберат дополнителните докази што во целост ќе ја разјаснат фактичката состојба и ќе овозможат донесување на правилна и законита јавнообвинителска одлука“, соопштуваат од СЈО.
Од Обвинителството укажуваат дека со откажување од обвинителниот акт во предметот „Пуч“ не прејудицираат дека некој е невин или виновен, туку сметаат дека за целосно и точно утврдување на фактичката состојба, потребни се дополнителни докази, коишто не можат да бидат прибавувани во фазата на главната расправа.
Во случајот „Пуч“ обвинети се лидерот на СДСМ, Зоран Заев, поранешниот шеф на УБК, Зоран Верушевски, неговата сопруга Соња Верушевска и вработениот во Општина Струмица, Бранко Палифров. Сите се сомничат за неовластено прислушување, шпионажа и насилство кон претставници на највисоките државни органи. Досегашните рочишта за случајот „Пуч“ изминаа со низа одлагања, така што сé уште не започна главната расправа.
