Премиерот Зоран Заев, кој денеска е во посета на Софија, утрово се сретна со раководството на партијата ГЕРБ и со нејзиниот претседател Бојко Борисов, пренесува Слободен Печат.
– Работната агенда во Софија ја почнавме со раководството на ГЕРБ и мојот пријател Борко Борисов. Разговаравме дека е многу важно да овозможиме младите генерации да имаат дијалог и разбирање. Не смееме да дозволиме младите да ни се замразат, напиша Заев на „Твитер”.
🇲🇰🇧🇬 Работната агенда во Софија ја почнавме со раководството на ГЕРБ и мојот пријател @BoykoBorissov.
Разговаравме дека многу е важно да овозможиме младите генерации да имаат дијалог и разбирање. Не смееме да дозволиме младите да ни се замразат. pic.twitter.com/y1ArSmxJPi
— Зоран Заев (@Zoran_Zaev) June 17, 2021
Заедно со Борисов, во име на ГЕРБ, беа поранешниот министер за надворешни работи на Бугарија Екатерина Захариева и заменик-претседателот на партијата и поранешен министер за надворешни работи Даниел Митов.
Борисов искоментира пред Заев дека ништо нема да се случи од неговата денешна посета на Бугарија. Лидерот на ГЕРБ го критикуваше бугарскиот претседател Румен Радев и рече дека бугарските власти ќе ги излажат и нема да сторат ништо.
– Ќе имате многу средби денеска. Убеден сум, особено за Радев, дека тие ќе ви кажат оти без Парламент, не може да се работи. Ништо нема да излезе од вашата денешна средба, рече Борисов.
Според него, сегашната привремена Влада на Бугарија ги има сите права и може да преговара со Северна Македонија и рече оти ако сакаат можат да преговараат за нов договор ако не им се допаѓа оној потпишан во 2017 година.
Борисов му ја повтори позицијата на Заев дека младите од двете земји ќе се замразат доколку не се постигне договор. Тој предвидува дека можеби нема да бидат потребни инфраструктурни проекти затоа што никој нема да може да се движи низ нив.
– Ако не најдеме решение – генерации Бугари и Македонци ќе се мразат едни со други. Претпоставувам дека привремениот кабинет на претседателот Радев ќе дезертира и одлуката за европска интеграција на Република Северна Македонија ќе биде оставена на следната редовна влада. Му благодарам на Зоран Заев што ги цени напорите направени од мене и владата на ГЕРБ да ја вратиме темата за европска интеграција на Република Северна Македонија и Западен Балкан на агендата на ЕУ, напиша Борисов на својот Фејбук профил.
