На Филозофскиот факултет на Универзитетот Св. Кирил и Методиј вчера студентите имаа можност преку целодневна алтернативна програма исполнета со предавања, работилници и презентации на истражувања и креативни активности да дознаат и поразговараат повеќе за емиграција на младите, дискриминација во образованието, сексуалното вознемирување во Македонија и младинската невработеност.
Еден од истражувачките тимови својот приоритет го стави на пристапот на младите со попреченост во образованието. Според нив, поминати се две децении од почетокот на образовната инклузија во Македонија, а со тоа и 20 генерации, но напредокот е спор. Тие посочуваат дека треба да се направат законски измени во кои јасно, детално и недвосмислено ќе биде дефинирано кои се правата, можностите и должностите на учениците и студентите со посебни потреби.
Овие истражувачки трудови кои наскоро ќе бидат во целост објавени се јасна слика дека младите студенти и истражувачи во земјата знаат да одберат важни теми и можат да дадат голем придонес. Преку нивните истражувања тие не само што ги надоградуваат своите лични знаења туку, и обезбедуваат нови податоци во значајни полиња за академската заедница и општеството, кои можат да бидат употребени при процесот на носење одлуки, особено во областите кои беа истражени.
На Станица: Студентска посетителите можеа да се запознаат и зачленат во 20 младински организации преку отворен саем. Дел од организациите одржаа и свои предавања на факултетот, со што Национален младински совет на Македонија, ЏЕФ Македонија, ХЕРА, ЕМСА, ИАЕСТЕ, Субврезивен фронт, КРИК, Гоу грин, Истражувачко друштво на студенти биолози, Social Impact Award, Сојуз на извидници и индивидуалци истакнати во своите полиња, дадоа придонес кон збогатување на академскиот ден на студентот.
Станица: Студентска имаше за цел да обезбеди простор за современи предавања кои студентите ретко имаат можност да ги следат на нивните факултети, можност да се информираат за организациите кои се отворени за нив, да учествуваат во работилници, да се запознаат со нови истражувања и да разменат искуства и контакти.
Шестото издание на Станица: Студентска го организираше МОФ со поддршка на Фондации Отворено општество.
Б.Ј.
