„Значи, 2017 беше генерално многу лоша година. Мојот внатрешен скептицизам којшто го поседувам премина во доза на нереален оптимизам очекувајќи дека ќе се случат многу работи, имајќи ги предвид сите движења во општеството, сите случувања кои изминативе две години се случија“, вели новинарот Љубиша Станковиќ, во разговор со ЦИВИЛ Медиа за Перспективи 2018.
„На почетокот на февруари, на денот на новинарството, јас како претставник на Утрински весник излезам на улица со сите мои колеги од другите весници на МПМ и да покренам штрајк. За жал, таа битка ја изгубивме, што за мене беше поразително од аспект на тоа што стотици колеги останаа на улица, истите тие коишто се обидуваа да ги чуваат брендовите на таканаречените газди кои ги немаше сето тоа време. Знаете, сето тоа се одразува и на личното здравје, како ментално туку и физичко, па така и јас попуштив пред сите тие случувања.
Од друга страна бев тој којшто сметаше и сè уште смета дека менталното здравје е сепак најбитно и најважно. И тоа им го пренесувам на моите колеги и ден денеска, иако дел од нив се сè уште на улица. После се и мене ми се случија некои нови медиуми, условно речено нови медиуми. Се пробав себе си во некои други сфери, други области, повторно новинарски, и после онаа фраза ‘после секоја изгубена битка се добива војна’, се поубеден сум дека војната мора да се добие.
За жал, и овие случувања сега со владата, со тела, со финансирање или нефинансирање, помагање на медиуми, и сето тоа е дел од таа една приказна која остава простор за голема резерва во смисла на тоа дека нема перспектива. Убаво е кога се отвараат нови медиуми, кога постои здрава конкуренција, кога едни со други се натпреваруваат во информациите. Но некако како работите да излегоа од контрола и работите отидоа во некој друг правец, што мене сериозно ме загрижува“, вели Станковиќ.
„Ако биде и 2018 таква, а не би сакал тоа да се случи, ќе биде многу тешка и многу сериозна година, не само за новинарите и медиумите, туку пред се за власта и за опозицијата“, заклучува тој.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество. „Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Биљана Јордановска
Камера: Атанас Петровски
Монтажа: Биљана Јордановска
Фотографија: Вулнет Махмути
Обработка на текст: Маја Ивановска
