Директорот на Дирекцијата за заштита и спасување (ДЗС), Стојанче Ангелов, во гостување на поткаст „На кавга со Иван“ на Канал 5, истакна дека решението за депонијата Вардариште е со сила да се реши проблемот со „една ромска група“ која, според него, е виновна за палење на отпадот.
„Се оградувам, не мислам на сите Роми, да не бидам обвинет за шовинизам, расизам и така натаму. Но оние Роми коишто живеат во депонијата се тие што палат кабли за да го извлечат бакарот…“, рече Ангелов.
Иако водителот Иван Мирчевски и Сотир Костов се обидоа да го корегираат дека евентуално преселување мора да биде на хуман и достоинствен начин, не на сила, Ангелов категорично одговори:
„Јас сум за агресивна реакција. Мене ако ме прашувате јас би го решил тоа по кратка постапка, ги селам од таму… Ако е потребно и на сила“.
Кандидатката за градоначалник на Град Скопје, Каја Шукова, остро реагира на изјавата на директорот на ДЗС, Стојанче Ангелов, дека „Ромите од Вардариште со сила треба да се иселат“, со што, всушност, го открива вистинското лице на оваа власт, се вели во соопштението од СДСМ.
„Со кое право Ангелов кажува дека Ромите кои живеат во Вардариште требало ‘на сила да бидат иселени’? Ова е врв на нечовечноста, но и злоупотреба на луѓе од најниските слоеви за да се оправда нивната неспособност да направат нешто за да се спречат пожарите“, реагира Шукова.
Кандидатката за градоначалник Шукова истакнува дека Ангелов и министерот за внатрешни работи Панче Тошковски, во немоќ ниту да спречат, ниту да откријат виновници, а уште помалку да најдат исправно и хумано решение за луѓето, напаѓаат и дискриминираат цела заедница.
„Откако целата Влада излезе со различни ставови за тоа кој пали и кои се причините, откако сами себе се демантираат веќе цели два дена, сега конечно најдоа начин да се бранат со оцрнување и етикетирање“, наведе Шукова.
Власта е неспособна и шири ароганција и гнев поради сопствените неуспеси.
„Граѓаните на Скопје треба да знаат дека локалните институции имаат задача да најдат решение за проблемот, а ВМРО-ДПМНЕ цели четири години не најде решение, ниту воопшто работеше на тоа. Фатени во криза од својата неспособност, не им останува друго освен да измислуваат странски центри и да напаѓаат луѓе на кои и онака животот им е многу тежок“, наведе Шукова.
Овој директен повик за употреба на сила не само што е спротивен на човековите права, туку и ја оживува најопасната реторика на колективна вина и репресија.
Ова не е првпат Ангелов да предизвика револт со дискриминаторска порака кон ромската заедница. Во 2017 година, негов статус на социјалните мрежи предизвика лавина реакции од ромски организации. Под јавен притисок, тој тогаш во Шуто Оризари јавно се извини, нагласувајќи дека Ромите се македонски граѓани и совесни луѓе и дека жали за непријатностите предизвикани од неговата изјава.
видео: ЕУ Ромапрес
Д. Муратов
