Ирена Стеријовска режисерка и граѓанска активистка во изјава за ЦИВИЛ Медиа зборува за последното решение од МВР кое пристигна на нејзина адреса за „нарушување на јавен ред и мир“.
„Јас сум изненадена, пред сè, затоа што одлуката за овој прекршок е донесена на 12.12.2017 година, што значи пред два месеци. На решението стои ‘рушење на јавен ред и мир’, односно недолично однесување, дерење и викање. Јас се разбира не го прифаќам тоа, прво, затоа што бев дел од осмислувачите на тој протестен настан и второ затоа што ништо од тоа не беше недолично однесување“, вели Стеријовска.
Таа додава дека во текот на изминатите годините била принудена да ги научи сите форми на протест во кое нема да има никакво незаконско пречекорување.
„Тоа воопшто не беше упад, како што го нарекуваат, затоа што сите 40 души коишто бевме таму и коишто учествувавме во протестниот настан, уредно си купивме карти. Ние бевме активна публика, којашто беше повикана и одговори на повикот“, објаснува Стериовска.
Таа истакна дека никогаш не би направила нешто лошо за театарот, бидејќи доаѓа од тој сектор.
„Она што е навистина тажно е тоа што актер со толку годишно искуство, којшто ја презема улогата да биде церемонијал мајстор, не може да се носи со реакцијата на публиката ако не му се допаѓа“, вели таа.
Маја Ивановска
Камера: Дехран Муратов
