Основното јавно обвинителство Струга оформи предмет по допрен глас во врска со написите во одредени медиуми дека за време на одржувањето на Вевчанскиот карневал било запалено знаме на Република Бугарија.
Како што соопшти ЈОРМ, предметот е оформен со цел да се испита постоење на кривично дело „повреда на угледот на странска држава“ од член 181 од Кривичниот законик.
– Притоа, надлежен јавен обвинител издаде наредби до СВР Струга со цел утврдување на идентитетот на сторителот, како и идентификација на други присутни на настанот. Во исто време, по наредба на јавен обвинител ќе бидат обезбедени евентуалните снимки од камери на кои е регистриран инцидентот, а ќе бидат преземени и други дејствија за расчистување на кривично – правниот настан, се наведува во соопштението.
Општина Вевчани најостро го осудува чинот на палење на знамето на Република Бугарија за време на Вевчанскиот карневал, соопшти денеска градоначалникот Сашо Јанкоски.
Овој чин, според него, не соодејствува со ставот на Општината и најголемиот процент на нејзиното население.
– Напротив, Вевчани е меѓу првите општини во Македонија збратимена со градчето Мелник, општина Сандански, како членови на Асоцијацијата на карневалските градови кои негуваат слични традиции, истакна Јанкоски.
Општина Вевчани и Вевчанци, нагласи тој, и во минатото веднаш ги осудувало палењата и на знамиња и на други држави.
– Упорно стоиме на ваквиот став и во иднина ѝ сметаме дека ваквиот чин на изразување револт е недопустлив макар и за најирационалниот, најстариот и најавтентично сочуван пагански карневал во светот како што е опишуван Вевчанскиот низ годините од речиси сите светските медиуми. Се надеваме дека овој несреќен чин и ирационален чин нема да фрли дамка на меѓусоседските односи, посочува Јанкоски во осудата.
На традиционалното палење василичарски маски, вчера во Вевчани беше запалено и знамето на Република Бугарија, кое беше дел од маските.
