„Да се спроведат напредни обуки за судиите, обвинителите и за полицијата, за истраги и за кривични постапки за трговија со луѓе, да се одвојат зголемени средства за заштита на жртвите, да се обучат полицајците, трудовите инспектори, дипломатскиот персонал и други државни службеници за проактивна идентификација на жртвите, особено меѓу децата-питачи, нелегалните мигранти, бегалците и барателите на азил“, се наведува во годинешниот Извештај за трговијата со луѓе што го подготвува американскиот Стејт департмент.
Во Извештајот Македонија е посочена како земја која е извор, транзит и дестинација за мажи, жени и деца – жртви на трговија со бели робје, односно, лица принудени на принудна работа и на проституција. Стејт Департментот смета дека и изминатата година, Владата на Република Македонија целосно не ги исполнувала минималните стандарди за елиминација на трговијата со луѓе, но дека се правеле значителни напори за тоа да се постигне.
„Во споредба со периодот од претходниот извештај, Владата демонстрирала зголемени напори поради што останува на второто ниво“, стои во извештајот. Се наведува и дека македонските власти направиле чекор со подготвување и со усвојување на Национална стратегија и на национален Акциски план, и со назначување на национален известувач и национален координатор за трговија со луѓе.
Нотирано е дека во изминатиот период, во споредба со претходните години, многу помалку шверцери/трговци со луѓе се обвинети и се осудени, дека не се доделени грантови на невладини организации за борба со трговијата на луѓе, и дека е прекинато и партнерство со невладини организации што обезбедуваат поддршка на владините згрижувачки центри.
„Шверцерите со луѓе често ги поткупуваат полицијата и инспекторите за труд. Имало истраги и казни за полицајци кои биле соучесници во трговијата со луѓе“, се наведува во извештајот.
На македонските власти им се препорачува детално да ги истражат, кривично да ги гонат и да ги казнат шверцерите, како и соучесниците од власта, и да се воведат соодветни казни за да се намали трговијата со луѓе.
