Во Кривичниот суд за денеска се закажани судења за предметите на Специјалното јавно обвинителство „Тифани“, „Триста“ и „Насилство во општина Центар“.
Во предметот „Тифани“ за даночно затајување е обвинета новинарката Ивона Талевска.
Случајот „Тифани“ се однесува на кривично дело што траело од 2008 до 2014 година, при што Талевска како управителка на друштвото за консалтинг „Смарт ДООЕЛ“ и на „Смарт груп ДООЕЛ Скопје“ за даночните 2008 – 2014 година одбегнала да плати даноци, а во завршните сметки давала лажни податоци, при што одбегнала да плати 2.314.463 денари или 37.634 евра преку фирмите и 1.040.840 денари или 16.924 евра личен данок.
На обвинителна клупа денеска повторно ќе седне и поранешниот помошник-министер за внатрешни работи Ѓоко Поповски, кој е обвинет за случајот „Триста”.
Според обвинителниот акт, Поповски е обвинет за незаконска набавка на 300 возила за потребите на МВР, односно за оштетување на државниот буџет за 453.570 евра.
Судско рочиште треба да се одржи и за седмообвинетиот Димче Крстев во случајот „Насилство во Општина Центар“, кој претходно беше раздвоен од постапката.
Крстев нема адвокат, а на последното рочиште се изјасни за невин.
Во случајот „Насилство во Центар” обвинети се 14 лица, меѓу нив и поранешниот премиерот Никола Груевски, поранешниот министер за транспорт и врски Миле Јанакиески и пратеничката на ВМРО-ДПМНЕ, Даниела Рангелова.
На претходните рочишта, вината за случувањата пред Општина Центар вo јуни 2013 година, ја признаа четвртиот обвинет, Томислав Лазаров и петтиот обвинет Јордан Ристевски.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
