„Секој на свој начин гледа на национализмот, патриотизмот и родољубието а ние некако забораваме на тоа. Патриотизмот и национализмот се толку блиски, но сепак многу далечни концепти. И двете именки се добри и позитивни онолку колку што се подредени на умереноста и доброто кое го нудат, не само од доброто од кое се хранат. И обратно, национализмот и патриотизмот се онолку лоши колку што се безгрешни за екцесот и злото со коешто се хранат. Сè е до умереноста, или во обратен случај во имањето или немањето усул“ истакна Дијана Тахири од ЦИВИЛ, на панел дискусијата „Патриотизам – да! Национализам – не!“ која ja организираше ЦИВИЛ – Центар за слобода.
Може да се биде патриот и родољуб во помирувањето на семејството, државата и народот. Но, не може да се биде патриот и шовинист, уништувајќи го својот дом преку омраза на семејството, воспевајќи ја патријата и нацијата во златен кафез кој што и покрај сиот сјај е сепак кафез на осаменост и отуѓеност.
Има еден цитат од Рилке во кој се вели: „Уривањето на една земја е ништо повеќе од една минлива баналност, меѓутоа една изгорена фабрика е вистинска трагедија“. Државата се руинира, меѓутоа ако изгориш една фабрика гориш многу семејства“, додава таа.
Тахири се осврна на една случка од пред некој ден каде што две девојки (едната со марама) не биле пуштени во полупразно кафуле во Скопје бидејќи не резервирале, сред бел ден. За после половина час да се врати девојката која не носела шамија и без никаков проблем и резервација да седне во кафулето.
„Јас цел живот живеам во Скопје и се додека Турците не го отворија „Рамстор“ реткост беше да се види жена со марама како седи на кафе. Тоа беше така, бидејќи им пречеа отровните погледи на луѓето што ги гледаа и не им беше пријатно. Национализмот постои дури и во верските објекти, колку и да мислиме дека не е така…“, додаде меѓу другото Тахири.
Дехран Муратов
Фотографија: Биљана Јордановска
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
