Забраната на Талибанците за жени кои работат во невладини организации во Авганистан не се однесува на вработените во Обединетите нации, меѓународниот женски персонал и жените кои даваат здравствени услуги, пишува ДПА.
Талибанскиот министер за економија Дин Мохамад Ханиф ги истакна исклучоците на состанокот со вршителот на должноста шеф на Мисијата на ОН за помош на Авганистан (УНАМА) Рамиз Алакбаров вчера во Кабул.
Последното ограничување на Талибанците за авганистанските жени да работат во невладини организации, предизвика бес кај западните земји и меѓународните институции, кои се заканија дека ќе ги прекинат активностите во земјата погодена од криза доколку забраната не биде укината. Неколку големи невладини организации веќе ја прекинаа својата работа.
Според документот до кој дојде ДПА, Ханиф изјавил дека главната причина за одлуката е непочитување на талибанските правила и прописи во однос на носењето хиџаб.
Секоја влада има своја рамка и прописи што треба да се почитуваат, вклучувајќи го исламскиот хиџаб и обезбедувањето поволна работна средина за жените, истакнал Ханиф.
Талибанскиот министер, исто така, нагласил дека во текот на годината забележал непочитување на талибанскиот кодекс на облекување и се обидел да го реши проблемот преку дијалог со невладините организации додека прашањето не стигне до повисокото раководство.
Извори од невладини организации велат дека не се оправдани обвинувањата за несоодветно покривање на нивниот женски персонал.
Според една невладина организација во Кабул, која има канцеларии и во други провинции, Талибанците никогаш не влегувале во нивните згради или не ги запирале автомобилите со нивните вработени жени на контролен пункт поради несоодветна облека, а машките талибанци не можеле да влезат во делови од канцеларијата каде што работи женски персонал.
Министерот истакнал дека ќе поддржи изнаоѓање решение и дека му требаат неколку дена да и се обрати на УНАМА со предлог.
Шефот на Канцеларијата на ОН за човекови права, Волкер Турк, предупреди дека забраната на жените да учествуваат во образование и работа во Авганистан може да го дестабилизира општеството и да предизвика „ужасни, каскадни ефекти“ во земјата.
Овие неразбирливи ограничувања за жените и девојчињата не само што ќе го зголемат страдањето на сите Авганистанци, туку, се плашам, претставуваат ризик и надвор од границите на Авганистан, предупреди денеска Турк во Женева, мислејќи на ризикот од нови бранови бегалци.
