Таравари отворено говори за причините зошто не ѝ верува на владата на Зоран Заев, за аферата „Рекет“, како и за одговорноста на ДУИ поврзана со владеењето на правото. Притоа, тој во детали ја сподели сторијата за безрезервната поддршка на Алијансата за СДСМ, како единствена можна опција, по парламентарните избори во 2016 година, бидејќи, како што вели: „Режимот мораше да падне!“ За разлика од нив, Али Ахмети предолго размислувал околу опциите за коалицирање меѓу СДСМ и ВМРО-ДПМНЕ, потсетува Таравари, иронизирајќи со неговите „пет опции“. Десет месеци подоцна, за време на локалните избори во 2017 година, СДСМ ѝ возврати сосема поинаку на Алијансата – го поддржа ДУИ, за сметка на Алијансата.
„Да беа добри кандидатите на ДУИ, немаше да биде проблем, но тоа се луѓе за кои постојат индиции дека се вмешани во криминал!“ – вели Таравари. ДУИ ги смета за најодговорни за уривањето на кредибилитетот на владата: „Половина од режимот е во состав на владата!“
Тој инсистира дека составување на експертска влада е единствениот излез од ситуацијата во која кредибилитетот на владата е целосно нарушен. Сепак, ја издвојува министерката Мила Царовска како модел за одговорно и успешно водење на еден владин ресор. Во првиот дел од интервјуто, тој го издвои и Тевдовски како одличен министер за финансии, кој, според него, не требало да биде сменет.
Совпаѓањето на барањата на Алијансата за предвремени парламентарни со оние на ВМРО-ДПМНЕ е случајно. Нема комуникација меѓу Алијансата и ВМРО-ДПМНЕ на централно ниво. По сето искуство со СДСМ, Таравари не ја исклучува можноста од постизборно коалицирање со ВМРО-ДПМНЕ.
Идејата што стои зад Стратегијата „Едно општество за сите“ е перфектна. Но, тоа што новоформираното министерство во чии ингеренции е спроведувањето на Стратегијата му е доделено на „најспособниот министер“ на ДУИ говори за тоа дека владата не е сериозна во намерите да ја спроведе. За разлика од тоа, без и да напише таква стратегија, општина Гостивар веќе ја живее таа стратегија.
Наспроти сѐ, Таравари не испушта да каже дека го почитува Зоран Заев и неговите значајни постигнувања во договорите со Грција и Бугарија, велејќи дека премиерот ќе остане запаметен по своите големи потези, без кои не ќе беше можно да се напредува.
Имајќи предвид дека во Алијансата за Албанците се зачленуваат и Македонци, Турци и Роми, го прашавме Таравари дали можеби се размислува за ребрендирање на партијата. „Зошто да не? Можеби не сега, но може да се размислува и за тоа“ – одговори Таравари.
Не сака да се кандидира за нов мандат, ниту како градоначалник, ниту како генсек на партијата. Најдобро се чувствува како доктор на клиниката со пациентите и студентите. Сепак, кажа дека го советуваат никогаш да не вели „не“ во политиката…
Редакцијата препорачува неизоставно целосно да се проследат и првиот и вториот дел од интервјуто со д-р Таравари.
Разговорот го водеше: Џабир Дерала
Камера и монтажа: Ариан Мехмети
Таравари (1. дел): Разочарувањето е големо, реформи нема, ни треба експертска влада…
Таравари: Разочарувањето е големо, реформи нема, ни треба експертска влада…
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
