Октопод на скара, запечени ракчиња, бифтек со прелив, коњско месо, месо од бизон, срна, дивеч и други специјалитети, па се до индиски ореви и скапи алкохолни пијалоци, од типот на „Курвоазие“, „Мартел“, „Чивас“ од по 1.600 денари чашка и води „Перие“, се најдоа на фискалните сметки на функционери на УБК и БЈБ, кои изнесуваат околу 500 евра, на секоја фискална сметка или фактура! Овие луксузирања на поранешните први луѓе на полицијата ги соопштија од МВР на денешниот брифинг со новинарите.
На едно гоштевање се трошеле околу три минимални македонски плати, а претежно се јадело и пиело во елитните скопски ресторани: „Воденица“ и „Камник“, како и во кафе-барот „Интермецо“ и клубот „Театро“.
Според информациите од МВР, од 2011 до 2016 година, УБК за репрезантации потошило над 34 милиони денари, БЈБ речиси 29 милиони денари, а администрацијата, под која спаѓа и кабинетот на министерот, потрошила 15,7 милиони денари. Најмногу се јадело и пиело на државна сметка во изборните години, односно во 2011 и 2014 година.
На фактурата од 12 април 2012 година, кога се случи петкратното убиство кај Смилковско Езеро, УБК се гоштевало во еден скопски ресторан. На менито имало секакви специјалитети – печурки на жар, тиквички, месо, пити… На фактурата се гледа дека тие потрошиле над 5.000 денари само за десерти.
Раководни лица од МВР, јаделе и пиеле пред денот на смртта на новинарот Никола Младенов.
За време на акцијата во кумановско „Диво Насеље“, на 9 мај 2015 година, во периодот на најжестоките престрелки во Куманово, според сметката која е издадена во 13 часот и 57 минути, првите луѓе на БЈБ, во ресторанот „Ла Тараца“, јаделе мешани морски плодови од 5.000 денари, и лосос на скара.
На друга сметка се гледа дека вработени во МВР нарачувале равиоли со фазан што чинат 1.200 денари, дивеч во ловечки сос што чини, исто така, 1.200 денари, бифтек од дивеч што чини 5.000 денари, потоа карпачо од коњском месо – 2.000 денари, стек од бизон 5.900 денари и стек од коњ – 4.500 денари. Јаделе и елен во сос од вргањ што чини 1.200 денари. Сметката што ја направиле за еден ручек или вечера е 38.350 денари.
На друга фактура од 6 јули 2011 година, на менито на УБК биле гамбори на жар што ги чинело 1.271 денар, за риба во фурна платиле 13.700 денари, а за мешано месо на жар – 1.016 денари.
Интересно е тоа што на 7 ноември 2012 година, во ресторанот „Воденица“, во исто време се издадени три посебни сметки, за три посебни маси. Во „Камник“, за три порции специјална нарачка од кујна, се платени 25.250 денари, а за риба прва класа се платени 10.000 денари.
Ексшефот на УБК, Тони Јакимовски најмногу трошел за репрезентации. Од 2008 година до 2017 потрошил 2.387 866 денари за храна и пијачки по ресторани. Сашо Мијалков, ексшефот на УБК, за истиот период потрошил 1.104 773 денари. Гордана Јанкуловска потршила 1.320 195 денари за репрезентации само на фактури.
Славјанка Петровска, шефицата на Кабинет на министерот Оливер Спасовски, изјави дека трошењето за репрезентации не било докрај уредено во законот. Таа додаде дека Владата, на една од последните седници, донела заклучоци за усвојување на Правилник за репрезентации за министрите и именуваните функционери. Исто така, таа потенцираше дека министерот Спасовски ќе побара од Државниот завод за ревизија да се изврши увид во МВР.
На брифингот со новинарите, од МВР најавија дека допрва ќе бидат откривани и сумите кои се потрошени од службените картички на функционерите во оваа институција, бидејќи податоците кои ги објавија се однесуваат само за расходи од фактури.
Сметките покажуваат во каков раскош и луксуз уживале поранешните челници на МВР, останува прашањето на евентуална кривична одговорност, бидејќи граѓан(к)ите одамна се свесни дека морална одговорност – немаат.
Дехран Муратов
