Земајќи ги предвид последните случувања во државата и зголемениот интерес на пензионерите гласно да ги искажат своите ставови или, поточно, ставовите на другите, јавноста особено на социјалните медиуми е фокусирана на примањата на пензионерите од сите категории. За да се разбере бранот реакции во јавноста кои, навидум, доаѓаат од пензионерите, треба прашање да се разгледа во текот на годините.
Имено, во 2016 година, минимална пензија што ја исплати пензискиот фонд е 6.172 денари, додека потрошувачката кошничка во тоа време изнесува 32.102 денари.
Пензиите во износ кој не може да ги покрие ни трошоците за храна на највозрасните во државата, но пропагандата предизвика занес од бесплатни жичници до врвот на планината и ваучери за скијање кои возрасните и не можеа да ги искористат. А тоа беше само дел од популистичките мерки кои ги носеше режимот на Груевски.
Пензионерите имаа смешно мали пензии, но режимот лесно ги манипулираше со сугестии дека, наместо прилив на средства на нивните сметки, за нив се обезбедува грижа, па се организираат државни ресурси за спортување. А таа „грижа“, пак, ретко кој од пензионерите беше во состојба да ја користи.
Во тој период, кога пензионерите „скијаа“, се одвиваше скандалозно празнење на Фондот за пензиско и инвалидско осигурување, поради начинот на финансиско работење на груевистичката влада, која ги празнеше, а не ги полнеше фондовите.
Практиките што ги воведе режимот во тој период, значително го разниша пензискиот фонд, со чии пари се манипулираше, а не се работеше домаќински. Тие практики беа лоша почетна позиција за сегашната влада која, соочена со сите кризни состојби кои се наметнаа во изминатите години, дополнително требаше и да го стабилизира полуиспразнетиот пензиски фонд.
Сегашната политика води кон системски решенија кои ќе носат постојан раст на пензиите и нема да ги остават пензионерите со празни сметки во ниту еден период од нивните пензионерски денови.
Сепак, изгледа како пензионерите да имаат кратка меморија за она што навистина се случувало низ годините. Имено, поради големата Ковид криза пензиите се исплаќаат предвремено, а ваквото исплаќање на пензиите останува во пракса и денес. Сегашните практики водат кон тоа дека не е доволно само да се покачуваат пензиите, односно да води грижа за нивно континуирано порамнување, туку е потребно директно да се подобрува квалитетот на живот на највозрасните граѓани во државата.
Правото на мобилност се спроведува преку пакет мерките за помош на ранливите категории на пензионери. Преку услугата помош и нега во домот се овозможува негуватели да им помагаат на највозрасните во нивните домови, а ги исплаќа државата. Тоа се мерки со кои се овозможуваат на услуги и права кои навистина им се од корист на граѓаните.
Меѓутоа, пензионерите се жртви на политичка пропаганда, па се добива впечаток дека овие политики и мерки не им одат во прилог. Некој би рекол дека немаат потреба од дополнителни услуги и дека единствена потреба им е пензијата односно приходот на нивните сметки, кој и без нивно дополнително сугерирање се континуирано се покачува и ќе продолжи да се покачува, врз основа на методологијата која ветува систем на покачување на пензиите.
Накратко, владата овозможува системска сигурност, а не потсмев и манипулација на пензионерите.
Извор: Фронлајн.мк
