Американскиот претседател Доналд Трамп нареди изградба на објект за притвор за мигранти во заливот Гвантанамо во кој рече дека ќе има околу 30.000 луѓе, објави Би-би-си, пренесува ЦИВИЛ Медиа.
Тој рече дека во објектот во базата на американската морнарица на Куба, која ќе биде одвоена од нејзиниот воен затвор со високо обезбедување, ќе бидат сместени „најлошите криминални илегални имигранти кои му се закануваат на американскиот народ“.
Заливот Гвантанамо долго време се користи за сместување имигранти, практика која беше критикувана од некои групи за човекови права.
Подоцна во средата, „граничниот цар“ на Трамп, Том Хоман, рече дека постоечкиот објект таму ќе биде проширен и управуван од Службата за имиграција и царина (ICE).
Тој рече дека мигрантите може да бидат превезени таму директно откако ќе бидат пресретнати на море од американската крајбрежна стража и дека ќе бидат применети „највисоките“ стандарди за притвор.
Кубанската влада брзо го осуди планот, обвинувајќи ги САД за тортура и незаконско задржување на „окупирана“ земја.
Подготви: Д. Мишев
