Претседателот Доналд Трамп одобри распоредување на 300 војници на Националната гарда во Чикаго за да се справи со она што тој го нарекува криминал надвор од контрола, пренесува Би-би-си.
Овој потег дојде неколку часа откако имиграциските власти соопштија дека се соочиле со демонстранти во градот управуван од демократите и пукале во вооружена жена кога таа и други удриле со своите автомобили во возилата на полицијата.
Државните и локалните лидери со недели ги критикуваат плановите на Трамп за распоредување на Националната гарда и го нарекуваат злоупотреба на моќ. Гувернерот на Илиноис, Џ.Б. Прицкер, рече дека Трамп „се обидува да создаде криза“.
Објавата дојде откако федерален судија во Портланд, Орегон – уште еден либерален град – привремено ја блокираше администрацијата на Трамп да распореди 200 војници таму.
Судијката Карин Имергут ги нарече изјавите на Трамп за условите во Портланд „неврзани за фактите“ и рече дека потегот го крши Уставот.
Таа рече дека употребата на војската за смирување на немирите без согласност на државата Орегон го загрозува суверенитетот на таа држава и на другите, додавајќи дека тоа, исто така, ги разгорува тензиите во градот и предизвикува зголемени протести.
Имергут пресуди дека аргументите на администрацијата за распоредувањето „ризикуваат да ја замаглат линијата помеѓу цивилната и воената федерална моќ – на штета на оваа нација“.
Иако не е јасно дали војниците пристигнале во Чикаго, секое такво распоредување веројатно ќе се соочи со правни предизвици.
Д. Мишев
