Министерката за труд и социјална политика Јована Тренчевска денеска се сретна со постојаната координаторка на Обединетите нации во земјава, Росана Дуџак, со која разговараше за тековните проекти во кои Министерството за труд и социјална политика соработува со агенциите на ОН, како и за идната соработка во насока на креирање и имплементирање на уште подобри социјални политики кои ќе одговорат на потребите на граѓаните и поголема заштита на човековите права.
Како што соопшти МТСП, министерката Тренчевска информираше дека изминативе денови се одржаа состаноци со сите сектори во Министерството при што беше направен пресек на сите досегашни активности, воедно и досегашната соработка и заеднички активности со агенциите на Обединетите нации, пренесува информативната агенција МИА.
-Министерството за труд и социјална политика има одлична соработка со сите агенции на ООН на повеќе прашања кои се во надлежност на министерството. Особено е значајна соработката во подготовката на Законот за спречување и заштита од насилство врз жените и семејното насилство, како и креирањето и развивањето на мобилната апликација за поддршка на жртвите на родово базирано насилство каде во координирана работа работеа двата сектора еднакви можности и социјална заштита со УНДП, УНФПА. Соработката во креирањето на политиките во областа на родовата еднаквост продолжува и понатаму, рече министерката Тренчевска.
Во насока на идните заеднички активности, Тренчевска го посочи отворањето на Ресурсниот центар за родово одговорно креирање политики и буџетирање, кој е прв таков во регионот, со можност да прерасне во регионален центар. Центарот треба да обезбедува експертска поддршка, добри практики, истражувања и обуки за градење на капацитетите на државните службеници во областа на родовото одговорно буџетирање.
МТСП во соопштението наведува дека на средбата стана збор и за процесот на деинституционализација и правата на лицата со попреченост, при што беше истакнат одличниот напредок на нашата држава. Во поглед на заштитата и правата на децата, беше посочена соработката со УНИЦЕФ, која и натаму продолжува.
-Тренчевска изрази благодарност за досегашната помош и поддршка изминатите години, а особено во време на КОВИД-19, што претставува голем предизвик не само во поглед на здравството и економијата, туку и предизвик во поглед на човековите права и нивната заштита. Двете страни изразија задоволство за можноста за понатамошна продлабочена соработка со агенциите на ОН во областите кои се во надлежност на ова министерство, информира МТСП.