Министерката за труд и социјална политика Јованка Тренчевска денеска во Штип го посети Здружението на слепи лица при што беше информирана за тековните предизвици со кои тоа се соочува, за социјалните права кои ги користат и можностите како тие да се унапредат, за почитување на законите за правата на слепите лица и нивно подобрување. Од Здружението укажаа дека социјалните мерки помагаат во подигнувањето на животниот стандард на оваа група на граѓани, пренесува МИА.
Како што соопшти МТСП, министерката Тренчевска истакна дека грижата за лицата со попреченост останува висок приоритет на Влада и на МТСП, бидејќи квалитетното живеење е подеднакво важно и за овие граѓани во социјален ризик.
-Продолжуваме континуирано да се грижиме за сите категории на граѓани со попреченост затоа што тие се наши сограѓани, соседи, наши пријатели. Во имплементирањето на новите социјални услуги направени според специфичните потреби на граѓаните во секоја општина, клучни партнери ни се здруженијата и невладините организации. Со едукативно – советодавни активности и со теренските увиди во домовите за рано детектирање на лица во социјални ризици, заедно работиме на подигање на свеста за социјалната превенција. Нашата заложба е да создадеме општество без дискриминација, општество во кое сите граѓани да имаат еднаков пристап до сите ресурси и еднаков бенефит од нив, рече Тренчевска.
Претседателот на Здружението на слепи лица од Штип, Драги Витанов, рече дека голем број негови сограѓани имаат потреба, мерката лична асистенција да ја добиваат до длабока старост и за потребата од дом за слепи лица кои останале сами без ничија помош и грижа. Дел од членовите на Здружението за слепи лица го изразија своето задоволство од аудиочитачот за слепи лица.
Министерската Тренчевска порача дека апликацијата за слепите лица произлегла, токму од потребата од вклучување на слепите лица во заедницата, во изминатата година МТСП го промовираше аудиочитачот „Кико“ на македонски јазик и „Хана“ на албански јазик, со кој на слепите лица и на лицата со оштетен вид им се овозможува пишаниот текст да го слушнат и разберат во аудио верзија. Освен слепите лица, производот го користат и лицата со потешкотии во учењето, лицата со дислексија и сите други кои информациите најдобро можат да ги разбираат во аудио формат.
На територијата на Општина Штип повеќе од 5.000 лица користат различни видови социјална помош, гарантирана минимална помош, надоместок заради попреченост, приматели за помош и нега од друго лице, социјална сигурност на стари лица, детски додаток, образовен додаток. Овие мерки на лицата во социјален ризик им помагаат да се справат со сиромаштијата и социјалната исклученост, им помагаат за полесна интеграција во општеството, стои во соопштението на Министерството за труд и социјална политика.
