Трет ден по ред закана за бомба е стигната во скопско училиште. Од Министерството за внатрешни работи (МВР), велат дека е пријавено околу 14 часот на меил адресата на едно училиште стигнало закана за поставена експлозивна направа.
„Веднаш по добиената пријава, од полициски службеници се преземаат мерки за безбедно евакуирање на училиштeто и антитерористички проверки и се преземаат мерки за расчистување на случајот“, велат од МВР.
Изминатите два дена во повеќе средни скопски училишта стигнаа лажна дојава за поставена бомба, по што учениците беа евакуирани и наставата прекината.
Досега лицата која ги испраќаа(т) заканувачките пораки не се откриени, а од МВР за ЦИВИЛ велат дека работат на случајот и откривање на сторителите.
Оваа ситуација со (лажните) закани за бомби во училиштата ја искористија дел од граѓаните кои се симпатизери на опозицијата.
Игор Ѓуровски (симпатизер на Левица) пишува дека „се утепал од смеење“ кога им ја сфатил финтата со заканите за бомби, дека всушност се празни секое училиште кое нема греење.
Ваквите потпалувачки објави и коментари на социјалните мрежи, кои инаку воопшто не се за смеење, се за добивање евтини политички поени, додека учениците, наставниците, родителите и целата јавност се испаничени од заканите со бомби.
Исто така и актерот Сашо Тасевски без никакви докази прстот го посочи кон власта дека е организатор на ваквите немили настани.
Но, тензија и паника не креваат само одредени лица (симпатизери и поддржувачи на опозицијата), туку и дел од медиумите.
Во порталот Фактор излезе наслов: „ДОЈАВИТЕ НА БОМБИ ИАКО СЕ ЛАЖНИ РОДИТЕЛИ ДОНЕСОА ОДЛУКА: Денеска нема одење во школо“. Но, за разлика од бомбастичниот наслов дека родителите нема да ги пуштаат во училиште своите деца поради страв од заканите за бомби, сепак во текстот има изјава само од една анонимна загрижена мајка која своето дете нема да го пушта да оди на училиште додека не се реши проблемот. Порталот донесе заклучок дека родителите нема да ги пуштаат децата во училиште со само една изјава од еден родител.
Министерот за внатрешни работи, Оливер Спасовски, вчера изјави дека никој не смее да дозволи да се игра со судбините на децата и додаде дека ова е сензитивна тема и без разлика кој го нарачува сето ова треба да има на ум дека не може да се игра со системот и со граѓаните на Република Северна Македонија.
Истрагата е во тек, ги знаеме првите податоци за тоа од каде се испратени тие меилови. Најважно е да успееме да ги откриеме сите ИП адреси од каде доаѓа овој, би рекол, монструозен чин, без разлика дали станува збор за хибриден напад врз Северна Македонија или политички игри, како една од претпоставките. Без разлика на што се однесува, никој не смее да дозволи да се игра со судбините на децата и на сите нас, ова е сензитивна тема и сметам дека без разлика кој го нарачува сето ова треба да има на ум дека не може да се игра со системот и со граѓаните на Република Северна Македонија”, истакна министерот Спасовски.
За разлика од опозициските подржувачи и одредени медиуми, средношколците излегоа позрели повикувајќи на смиреност и бараат од Министерството за внатрешни работи максимално да се посвети на потрагата по чиновниците и брзо разрешување на ситуацијата, за повторно да може да продолжат со непречена и безбедна настава.
„Овие закани мора да бидат сфатени сериозно имајќи ја предвид безбедносната состојба во земјата и светот“, апелира Сојузот на средношколци.
Во допис до медиумите Сојузот ја поздравува брзата реакција на надлежните и безбедносните служби во однос на евакуациите и смета дека покажаната подготвеност и професионалност во ваквите ситуации влеваат одредена доза на сигурност кај учениците.
