Преспанскиот договор со Грција и Охридскиот рамковен договор се најдоа на листата на САД на клучни договори од регионот, кои доколку не се почитуваат и спроведуваат може да доведат до дестабилизација. Ова стана јасно откако американскиот претседател Џо Бајден потпиша нов декрет со кој им забранува влез во САД на сите лица што од Западен Балкан што нема да ги почитуваат овие договори, а воедно и ќе им го конфискува имотот на територија на државата.
За одговорни се сметаат оние што ги прекршиле договорите за регионална безбедност и мир, како Договорот од Преспа, Охридскиот рамковен договор, Резолуцијата 1244 и Дејтонскиот договор.
Младите, граѓанското општество, европските вредности – (не)возможна мисија
ЦИВИЛ 7 е редовен видео прилог на ЦИВИЛ Медиа, во кој, секоја седмица се отсликуваат активностите и работата на редакцијата на ЦИВИЛ Медиа. Еднаш седмично, тимот на ЦИВИЛ се осврнува на најглавните случувања во државата, како и на активностите кои редакцијата секојдневно ги извршува.
Оваа недела зборуваме за европските вредности како реална перспектива, младите како нејзини двигатели, декретот на претседателот на САД Бајден за дестабилизација на регионот доколку не се почитуваат клучните договори и за самитот на седумте најразвиени земји.
ЦИВИЛ минатата недела одржа две панел дискусии , „Европските вредности – реална перспектива или недостижна цел?“, на кој учествуваа Лепа Џундева, новинарка во ТВ24 и уредничка на емисијата „Европат“, активистот Тефик Махмут и Самет Шабани, Хоризон Цивитас, и „Младите и европските вредности“ Учесници на панелот беа Билјана Арсовска-комуниколог, Андреј Стојкоски-Национален младински совет на Македонија и Билјана Стојческа-Младински сојуз Крушево.
За Џундева, Махмут и Шабани на панелот на ЦИВИЛ: Европските вредности се достижна цел.
„Според она што го имаме во моментов како една слика е дека граѓаните сакаат да чекорат напред кон ЕУ но возот се движи бавно, не само во однос на политиките на ЕУ и аспирациите наши, туку и во однос на промените кои мора да почнат од самите нас“, рече Лепа Џундева.
„Треба да се разликува меѓу европски вредности европски принципи. Тоа што се гради ѕид меѓу една етничка група не е во согласност со правниот поредок во државата и европските вредности“, нагласи активистот за човекови права Тефик Махмут.
„Што се однесува на граѓанското општество, сметам дека граѓанското општество беше еден од главните столбови за промените во последните 7-8 години кога и почнаа првите чекори против тогашната власт, и од тука произлегува таа разлика и свесност и тоа што денес го нарекуваме европски вредности. И во европските земји на промена почнаа за почитување за веќе нарушеното достоинство“, изјави Самет Шабани.
Стојческа, Арсовска и Стојкоски на панелот на ЦИВИЛ за младите и европските вредности се изјаснија дека Младите ги поседуваат европските вредности, не смеат да кренат раце од промените
„Младите луѓе се запознаени со европските вредности, веруваат во тие вредности и ги применуваат во нивното секојдневно живеење. Има мал број на млади кои не знаат дека ги носат и применуваат токму европските вредности. Националниот младински совет е составено од млади луѓе кои веруваат во европските вредности, и создавањето на НМСМ е токму заснована на демократијата и солидарноста“, истакна Андреј Стојкоски од Национален младински совет на панелот на ЦИВИЛ: „Младите и европските вредности“.
„Имав можност да студирам во Словенија и имав прилика да научам многу повеќе за европските вредности. Кога на 18 години отидов во Словенија имав потешкотии да се прилагодам. Промените што се случуваа во време на Шарената револуција ја следев од таму. Во однос на дигитализацијата, имаме можност да растеме. Нема оправдување дека не може нешто да се смени и да кренеме раце. Не смееме да кажеме „пиши пропало“, мора да се бориме за поздрава средина и поубави можности“, изјави Билјана Арсовска на јавниот настан на ЦИВИЛ на тема „Младите и европските вредности“.
„Јас сум голем поддржувач на младите луѓе. Јас за разлика од младите луѓе, јас верувам дека младите се сегашноста, всушност иднината. Сигурно треба да веруваме дека се иднината, но јас велам дека се сегашноста и сум силно убедена дека ние го креираме тој контекст, ако зборуваме од контекст на младите, младите го креираат тој контекст за можности, негување и промоција на европските вредности. Јас би рекла, ајде ние што правиме за младите луѓе да можат да ги развиваат, промовираат овие европски вредности во нашиот контекст. Ние како организација, вие како медиум и организација, сите заедно што правиме?“, изјави Билјана Стојческа од Младински сојуз на Крушево, на јавниот настан на ЦИВИЛ на тема младите и европските вредности.
Лидерите на Г-7 се согласија за вакцините, климатските промени и за глобален даночен систем
Минатата недела започна самитот на групата седум најразвиени земји (Г-7) во Лондон. Тридневниот Самит на Седумте најразвиени индустриски земји (Г-7) во Корнвол заврши со заедничката декларација во која се наведува дека Г-7 идната година ќе донира една милијарда вакцини против Ковид-19, ќе обезбеди повеќе пари за борбата против климатските промени и ќе се воведе глобален минимален данок од најмалку 15 отсто за мултинационалните корпорации.
Едиторијал
Во новата рубрика Едиторијал, Џабир Дерала зборува за тоа дека младите не само што разбираат што се европските вредности, туку и знаат како да ги негуваат и унапредуваат.
Младите знаат! Општеството е поларизирано, а деструктивните и антизападни структури сè уште се присутни и моќни, за да можеме да здивнеме сите заедно, а најмногу младите. Долг е патот пред нас, преполн со предизвици. Европските вредности не се недостижни, тие се вткаени во мислите и однесувањето на младите. Европската иднина е веќе во нивните раце, но има премногу грабливи погледи кои сакаат да им ја одземат. Меѓу нив се луѓе од мојата генерација, но и многу нивни врсници, тотално отруени од моите врсници.
Ирена Крџиќ
камера: Дехран Муратов
монтажа: Ариан Мехмети
