Петчлена делегација на ЦИВИЛ одржа работна средба со премиерот Димитар Ковачевски на 10 мај. На средбата стана збор за три големи теми како што се мултикултурализмот и имплементацијата на Стратегијата „Едно општество за сите“; руската агресија врз Украина, дезинформациите и пропагандата; и изборите, изборните реформи и прашањето за предвремени парламентарни избори.
Беше постигната согласност за понатамошна соработка во домените на промовирањето на европските вредности, мултикултурализмот, човековите права, борбата против дезинформациите и пропагандата, како и отвореност за учество на граѓанското општество во изборните реформи.
На средбата со премиерот Ковачевски се отворија прашањата поврзани и со актуелното барање на опозицијата за предвремени парламентарни избори, како и со изборните реформи и процесот на подготовка на нов Изборен законик.
ЦИВИЛ го потенцираше својот став дека предвремени парламентарни избори, преку блокада на Собранието, се далеку од пожелни и потребни.
Очигледна е намерата на ВМРО-ДПМНЕ, преку блокирање на Собранието, да ја воведе државата во криза која би резултирала со предвремени парламентарни избори. Тие инсистираат на предвремени парламентарни избори сега повеќе од кога и да е. Понесени од успехот на локалните избори, тие се убедени дека ќе излезат како победници, потенцираа од ЦИВИЛ на средбата. Ова барање сведочи за неодговорност и занемарување на клучните процеси во земјата, ги загрозува интеграциските процеси и стабилноста.
Премиерот Ковачевски се согласи дека однесувањето на ВМРО-ДПМНЕ како политичка партија, е недоговорно, со цел да генерира дополнителна криза, за да бидат во можност да бараат предвремени избори. Премиерот беше дециден дека нема да има предврмени парламентарни избори и таквите се далеку од потребни.
Барање за предвремени парламентарни избори во ситуација кога нема реална политичка криза, туку таа се предизвикува со блокади, се далеку од пожелни и потребни. Особено затоа што се бараат избори во време кога надминувањето на економската, енергетската, па глобалната криза предизвикана од војната во Украина бараат континуитет, соработка и стабилност. И секако, вклучување на опозицијата во процесите, а не блокади. Таквото однесување во политиката е неодговорно, особено затоа што се настапува во име на граѓаните, а се блокираат демократските институции кои им припаѓаат токму на граѓаните, изјави претставничката на ЦИВИЛ, повикувајќи се на веќе искааниот став во анализата „Нови предизвици за стабилноста на државата: Преку блокада, до предвремени парламентарни избори“
На средбата се разговараше и за изборните реформи, кои во овој момент се важни за нивно финализирање, а според законот од измените во законикот, најмалку 6 месеци не треба да има избори, за поголема промена тој рок се продолжува на една година. Во тек е процес на изборни реформи во кои учествуваат голем број чинители, вклучително и странски експерти и фондации, како и процес на измени во Изборниот законик. Гледајќи и од овој аспект, одржување предвремени избори во моментов се невозможни.
Изборните процеси, а особено предвремените се шок за системот. Тие го поларизираат општеството и штетно влијаат на бизнисот и економијата. Изборите ја одложуваат, а неретко и ја прекинуваат имплементацијата на важни процеси и проекти. И скапи се. Затоа, силна препорака на ЦИВИЛ е изборните процеси секогаш да се одржуваат во нивните редовни термини, потенцираше Џабир Дерала на средбата со Ковачевски.
На средбата се постигна заедничка согласност дека предвремените избори во овој момент не само што ќе го закочат процесот на изборни реформи и други клучни процеси, туку ќе предизвикаат и дополнителни одлагања во носење закони што се во интерес на граѓаните и на државата.
Б. Јордановска