„Изборниот модел, изборниот систем во целина во Република Северна Македонија е зрел за сериозни реформи кои треба да траат подолго време за да не се направат сериозни и крупни грешки. И меѓународната заедница и дел од политичките субјекти, но најмногу се разбира граѓанското општество, граѓанките и граѓаните, поточно гласачите се заинтересирани за овие промени. Ние како организација за човекови права бараме од државата да овозможи максимални услови за исполнување на сите човекови права, особено на правото на глас“, изјави Џабир Дерала на прес-конференцијата што ЦИВИЛ ја одржа на отворено, за реформи на изборниот систем.
Упатувајќи апел дека е време веќе нешто да се промени, а не само да се повторуваат препораките, туку да се носат конкретни и функционални решенија, Дерала истакна дека мора да се промени праксата за донесување решенија зад затворени врати, особено за изборниот модел, Изборниот законик, воопшто спроведувањето на изборните процеси. Како што нагласи не може за тоа да зборуваат и одлучуваат само три/четири политички партии, туку мора да се вклучат сите политички партии и да се отвори за целата јавност.
Дерала ги упати главните препораки за изборните процеси и реформи на ЦИВИЛ како долгогодишна организација што ги следи политичките и изборните процеси во однос на изборниот модел, реформите во ДИК, Изборниот законик, изборната администрација и Избирачкиот список, финансирањето на политичките партии, корупцијата во изборните процеси…
„ЦИВИЛ има сериозни забелешки на финансирањето на политичките партии и политичките кампањи за време на изборите. Иако овој процес е далеку потранспарентен, сепак мора да подлежи на посериозна котрола и построги критериуми за делење на парите на граѓанките и граѓаните, оние што им ги даваат парите на политичките партии“, изјави Дерала.
Одговарајќи на новинарско прашање кои би биле предлозите на ЦИВИЛ доколку има предвремени парламентарни избори, Дерала изјави: „Предвремени парламентарни избори за Република Северна Македонија би биле самоубиство“, истакнувајќи дека во моментот сме во средиштето на еден стратешки важен процес, а тоа се евроинтеграциите, како и членството во НАТО.
Подетално за препораките на ЦИВИЛ: Изборниот систем на Северна Македонија одамна е зрел за коренити реформи
Биљана Јордановска
Камера: Дехран Муратов
Монтажа: Ариан Мехмети
