Цивил – Центар за слобода ги осудува сите облици на дискредитација на медиумите кои многу често потекнуваат од изјавите и однесувањето на дел од политичарите, во директна и индиректна форма. Со премногу леснотија, работата на медиумите се генерализира или се посочуваат одредени новинарски куќи или професионалци како непожелни или злонамерни. Дури и изјавите во кои политичарите индиректно осудуваат одредени медиуми, може да предизвика говор на омраза, па и насилство од нивните поддржувачи.
Во тој контекст, Цивил остро реагира и го осудува говорот на лидерот на ДУИ, Али Ахмети, кој на трибината на ДУИ во Гостивар, медиумите (Телма и Алфа) ги нарече „непријатели на Албанците“, алудирајќи на состојбата со „огнената група“. Таквиот начин на дискредитација претставува атак врз сите медиуми, а со тоа и врз демократијата и слободата на говорот.
Познато е дека медиумите, интелектуалците и активистите се честа мета на говор на омраза на социјалните мрежи и во дел од медиумите кои се под директна контрола на одредени партии.
Долгогодишна е и праксата на дел од партиите да ги блокираат медиумите што не се под нивна контрола и да одбиваат секаков вид комуникација со нив. Таков е примерот со ВМРО-ДПМНЕ кои со години не одговараат на новинарските прашања од ЦивилМедиа, но и од многу други медиуми.
Грубиот однос на политичарите кон медиумите е неприфатлив и мора да престане. Политичарите и политичките партии имаат обврска да бидат коректни во комуникацијата со јавноста, особено затоа што говорот на омразата и насилството директно произлегуваат од нивниот однос и изјави. Тие служат за пример во јавноста и, како што се однесуваат тие кон медиумите или кон своите политички опоненти, така ќе се однесуваат и нивните поддржувачи.
Без оглед на тоа дали се работи за индивидуално мотивирани напади или се работи за искажување став во име на политичка партија или иницијатива, не смее да се дозволи нетолеранција и малтретирање на новинарските екипи. Тоа е забрането со закон и институциите мора да реагираат соодветно и решително, без оглед на тоа за кого се работи.
Изјавите и повиците на политичарите со кои може да предизвикаат насилство и нетрпеливост кон новинарите, Цивил ги смета за напад врз слободата и демократијата. Ниту еден политичар или политичка партија, не треба да си дозволи напад против медиумите во било која смисла на зборот. Тоа важи и за лидерот на ДУИ, Али Ахмети.
