На фудбалските терени на Фудбалската федерација на Македонија (ФФМ), беше одржан спортски настан за подигнување на свеста кај младите, родителите и поддржувачите во рамки на заедничката кампања на Европската Унија и Советот на Европа насловена „Блокирај ја омразата. Сподели љубов!“.
Филип Поповски, генерален секретар на ФФМ, го поддржа настанот за ширење на позитивни пораки за влијанието на спортот и фудбалот врз идните генерации, потенцирајќи дека фудбалот е одлична платформа за испраќање на позитивни пораки.
– Со иницирање на активности за подигнување на свесноста за повисоко ниво на толеранција на фудбалските терени и надвор од нив се испраќа порака до навивачите, а особено младите за штетните ефекти од говорот на омраза и нетолеранција. Искрена благодарност до Европската унија и Советот на Европа за иницијативата и поддршката во организирање на оваа кампања, изјави Поповски.
Штефен Худолин, раководител за соработка во Делегацијата на ЕУ во Скопје, ја истакна важноста на спортот и фудбалот и неговото влијание врз младите.
– Фудбалот е обединувачка сила, токму затоа нема место за говорот на омраза во спортот. Спортот промовира почитување и славење на достигнувањата и различностите. ЕУ продолжува силно да ги поддржува напорите за борба против говорот на омраза, како и промовирањето на позитивните вредности и духот на фер игра и толеранција, порача Худолин.
Лејла Дервишагиќ, оперативна раководителка на Програмската канцеларија на Советот на Европа во Скопје истакна дека целта на спортот е да ги поврзе луѓето, да придонесе кон подобро здравје и квалитетен живот, рушејќи ги бариерите преку градење на доверба и чувство на припадност, јавува МИА.
– Повеќе од 40 години, Советот на Европа се залага за фер игра и почит на спортските терени. Кампањата „Блокирај ја омразата. Сподели љубов“ е заеднички напор на Советот на Европа и Европската Унија за поддршка на борбата против говорот на омраза. Многу е важно што денес споделуваме пораки дека љубовта, фер-играта и почитта се вредности кои ни се потребни во, но и надвор од фудбалскиот терен, вели Лејла Дервишагиќ.
Селекторот на македонската А фудбалска репрезентација и еден од амбасадорите против говор на омраза во рамките на кампањата, Благоја Милевски порача дека фудбалот значи ширење на пријателство, еднаквост и промовирање на здрав начин на живот и спортска култура.
– Ги охрабрувам сите млади и повозрасни активно да се вклучат во кампањата и да ја пренесуваат пораката на овој проект за присуство на пријателството и еднаквоста на спортските терени, како и во секојдневниот живот, додаде Милевски.
Кампањата „Блокирај ја омразата. Сподели љубов!“ се фокусира на борбата против говорот на омраза и дискриминацијата, во соработка со Македонската фудбалска федерација. Идејата на денешниот настан беше низ игра и спорт да се доближат прашањата за различностите и инклузијата до младите спортисти, а главната цел на настанот беше да се подигне свеста кај младите за различните форми на говор на омраза, како и да се промовираат начините за борба против омразата особено во спортот и фудбалот.
Кампањата се спроведува во рамки на проектот „Промоција на разноликоста и еднаквоста во Северна Македонија“, кој е дел од заедничката програма на Европската унија и Советот на Европа, Horizontal Facility за Западен Балкан и Турција 2019-2022.