„Тврдокорни“ со српска клетва ги повикуваат Македонците во борба за Македонија?!

„Тврдокорните“ утре напладне, кога треба да започне собраниската седница за уставните измени, ќе протестираат. Тие упатија клетва до сите Македонци кои нема да учествуваат во борба за Македонија да немаат од срцето пород.

Инаку, клетвата на „Тврдокорните“ многу наликува на српската клетва на кнез Лазар Хребљановиќ пред Косовската битка, која гласи: „Ко је Србин и српскога рода / И од српске крви и колена / А не дош’о на бој на Косово: Не имао од срца порода / Ни мушкога, ни девојачкога! Од руке му ништа не родило / Рујно вино, ни шеница бела! Рђом кап’о, док му је колена!“.

„Тврдокорните“ потенцираат дека во овие навидум обични денови се одигруваат настани кои ќе одекнуваат не само нанапред во иднината туку и наназад во вековите од македонското минато.

„Секој достоинствен Македонец без да се убедува треба да знае дека е должен со присуство на протестот во свое име и во име на честа на своето семејство да ја покаже несогласноста со чинот на најголемото национално предавство. Македонија ќе им припадне на Македонците. Но овие настани определуваат кои ќе бидат идните Македонци предводници, а кои, во македонската држава, ќе мораат да бидат послушни и подредени на достоинствените. Кои семејства ќе ја зачуваат честа на името, а кои ќе треба да се превоспитаат.

Никакви оправдувања и никакви изговори нема да важат. Затоа браќа и сестри во среда напладне (9-ти Коложег), лице во лице да се видиме кои сме. Македонија на Македонците!“, порачуваат „Тврдокорни“.

Д. М.