пишува: МЕРСИХА СМАИЛОВИЌ
За Чаир можете да слушнете прекрасни приказни, случки и доживувања, но, многу почесто можете да слушнете дека тука живеат „дивјаци“, „индијанци“, кршачи на закон, дека владее корупција…
Проверете на пребарувачот Google и ќе се уверите. Нас Чаирчани тоа многу нѐ боли, посебно, кога ние ја знаеме прекрасната страна на Чаир. Во оваа општина има најголем број хуманитарни организации и иницијативи. Основани и со седиште во Чаир, а делуваат низ цела Македонија, дури и преку границите.
Се грижат за социјално ранливите жители, за сираците, за студентите, старите изнемоштени лица, бегалците, комшиите…. Таа грижа не познава ниту религија ниту нација! Помагаат секаде каде помошта е потребна. Секој поединец помага, секој поединец ѝ служи на уличката и маалото во кое се наоѓа. Се формираат иницијативи кои собираат од околните продавници и бутици, храна, облека, хигиенски средства и истата ја донираат. Никогаш не губат надеж во хуманоста, туку живеат за да помагаат, се будат наутро и веднаш се впуштаат во хумана мисија.
Чаирчаните и чаирчанките безусловно ги подржуваат локалните организации и иницијативи и скоро секој од нив е донатор со отворена рака, широко срце и свесен ум.
Чаирчаните и чаирчанките не дозволуваат да имаат комшија кој нема што да јаде. Се дели оброкот, грижата, среќата но и тагата.
Хуманоста и солидарноста е нешто по кое треба да ги препознаете и прв синоним кога ќе сретнете Чаирчанец.
Илјадници и илјадници пакети со храна и хигенски средства се поделија само во изминатиот месец. Успешно се борат со последиците од здравствено економската криза предизвикана од Covid19. Бериќетот од солидарноста, од месецот Рамазан се почувствува низ цела Македонија. Овде само ќе напоменам неколку организации и иницијативи кои ми паднаа на ум, но вие слободно додадете кого пропуштив: поединци, организации, иницијативи, знам дека ги има многу.
Синџирот на хуманоста која почнува од Чаир, нека се шири и проширува низ целата држава и низ социјалниве мрежи.
Legis, Kalliri Mirësisë, O.K.H. MERHAMET, Hasene Balkans, NuN Civil Association, “Dora e artë” në Çair, Organizata Humanitare El Hilal, ENSAR Dernegi, Dritë Shprese, Matüsiteb Makedonya…