Учениците уште оваа година ќе полагаат екстерно тестирање, а прашањето колку тоа ќе влијае врз нивните завршни оценки, сè уште останува отворено.
Мандатарот Зоран Заев вчера за медиумите изјави дека укинувањето на екстерното тестирање ќе биде една од првите мерки на новата влада, односно, доколку е возможно, законот ќе биде изгласан пред 5 јуни, за кога е закажано тестирањето.
За неизвесноста во која се наоѓаат учениците, но и самите наставници и професори, за тоа колку ќе биде ефективно екстерното тестирање оваа година, колку ќе влијае на овогодишниот успех на учениците, разговаравме со Фросина Митрушева, професорка по математика во СУГС Гимназија „Раде Јовчевски – Корчагин“.
„Според најновите измени на законите за образование, овој документ би послужил исклучиво како додатен критериум, кога за продолжување на образованието во повисок степен (од основно во средно или од средно во високо), при бодирањето по другите критериуми, повеќе ученици имаат ист број на бодови. Овој додаток на свидетелството е можно, ако постои добра воља од парламентарното мнозинство и новата Влада, да биде прогласен за неважечки за оваа учебна година и по спроведување на екстерното оценување, со што би се оневозможило негативното влијание на оценките од екстерното, при уписите на учениците во повисок степен на образование“, изјави Митрушева за ЦИВИЛ Медиа.
Од предложената министерка за образование и наука, Рената Десковска, јавноста очекува многу, со оглед на наследената состојба во образовнието од претходните министри.
На прашањето колку предложените законски измени за укинување на екстерното тестирање и за укинување на одредби од Законот за наставници во основните и средните училишта, по скратена постапка, ќе придонесат за подобрување на образовниот систем и дали со новиот избор за министер на образнование, може да се очекува поголема транспарентност и соработка, професорката Митрушева пред сè, истакна дека е потребна сеопфатна анализа на образовниот систем. Според неа, тоа подразбира анализа на стручноста и компетентноста на наставниот кадар, но и на стручноста и компетентност на вработените во ресорното министерство, кои се сепак, најодговорни за состојбите во образованието.
„ Сметам дека доброто образование треба да е приоритет на било која влада која работи за доброто на државата, бидејќи тоа е основата на целиот натамошен развој на граѓаните, а со тоа, и на самата држава. Затоа, од новиот министер за образование очекувам целосна транспарентност и соработка со сите чинители на образовниот процес и на сите нивоа, со што ќе ја стекне довербата на граѓаните. Мислењата на најдиректно вклучените во образовниот процес, а тоа се наставниците и учениците, мора да бидат слушнати во сите наредни фази на работата во Министерството, ако се има вистинска волја за спас и придвижување на образованието кон потребите на дваесет и првиот век… Ние, наставниците знаеме дека процесот на промени може да биде многу мачен и болен, но подготвени сме да го прифатиме и да помогнеме во неговата реализација, ако тој води до поставување на образованието на вистинското место во општеството“, рече Митрушева за ЦИВИЛ Медиа.
Екстерното тестирање се предвидува за 5, 6, 8 и 9 јуни за учениците од основните и средни училишта.
Биљана Јордановска
