Денеска Украина го одбележува Денот на Вооружените Сили на Украина. Земјата е во војна за ослободување од руската воена агресија од 2014 година, и од целосната воена инвазија во 2022 година.
„Украина не беше таа што ја започна оваа војна. Украинците дефинитивно не беа тие што ја заслужија војната во нивната земја и нивните домови во 21 век. Но, Украина го избра патот да се бори и да се брани“, се вели во соопштението на Министерството за надворешни работи на Украина.
Во соопштението, им се оддава почит на сите што ја бранат земјата од агресорот, нагласувајќи го фактот дека „Украина е независна и слободна земја – и таква ќе остане“.
„Денес, на Денот на Вооружените Сили на Украина, ја оддаваме почитта на сите што ја бранат нашата држава. На секој татко кој го чува украинското небо од руските ракети и дронови, на секоја сестра која оди во напад врз непријателските позиции, на секој син кој замина да ги брани најблиските во рововите. На секој и секоја, благодарение на кои денес Украина е независна и слободна земја – и таква ќе остане“, нагласи МНР на Украина.
Тие што се борат за слободата на Украина се признаваат како херои, според МНР на Украина, при што се истакнува важноста на поддршката од партнерите, во име на заедничката цел.
„Мораме да останеме достојни на нашите херои кои, без претерување, даваат сè на фронтот за нашата спокојност. Таму каде што украинскиот војник е обезбеден со сè што му е потребно, таму е нашата безбедност и одвраќањето на непријателот од неговите позиции. Важно е партнерите на Украина да вложуваат максимални напори за единство во име на нашата заедничка цел“, пишува во јавното обраќање на МНР на Украина до светската јавност и завршува со зборовите:
„Слава на секој што ја брани украинската држава и нејзината слобода!“
