Украински беспилотно летало погоди руски нафтен танкер рано утрото во саботата во близина на источниот брег на Крим окупиран од Русија, еден ден откако украинско беспилотно летало погоди десантен воен брод во руската поморска база Новоросиск на Црното Море.
Нападите, кои се најсериозни врз руската морнарица од минатата година – се совпаднаа со новата директива од поморската управа на Украина која предупредува дека шест руски пристаништа на Црното Море ќе се сметаат за области со „ризична војна“ до понатамошно известување, пренесува Њу Јорк Тајмс.
Војната се враќа дома во Русија
Нападите надвор од воспоставените боишта доаѓаат додека руската војска масивно и непрекинато напаѓа цивилни цели во Украина со ракети и беспилотни летала, а Украина продолжува со контраофанзивата што ја започна на југ и исток пред околу два месеци.
Сега се води дебата за тоа дали Украина смее и како да напаѓа цели во Русија. Повод за тоа беше изјавата на украинскиот претседател Володимир Зеленски дека војната постепено се враќа во Русија по серијата напади од беспилотни летала врз главниот град на Руската Федерација, каде што била оштетена зградата до Министерството за одбрана, додека друг дрон удрил во деловниот центар Лерој Мерлин, и во последниот напад беа погодени облакодери во богатиот московски кварт, а украинските морски беспилотни пловила нападнаа клучно руско пристаниште на Црното Море, оштетувајќи еден руски десантен брод по серијата напади во Русија, откако Кијив вети дека ќе ја врати борбата дома во Кремљ.
Украина има право да се брани, вклучително и воени напади на руска територија
Според меѓународното право, нападната држава има неприкосновено право да се брани, но, западните сојузници кои ја поддржуваат Украина, бараат од неа за противнапади на територија на агресорска Русија да го користи само своето оружје.
„Во дадени околности, кога постои руски напад преку граница, Украина има право да се брани. Ова право вклучува и воени напади на руска територија за да се одврати, спречи или запре актот на агресија“, објаснува американскиот професор по право и бивш дипломат Давид Шефер, кој предава на Универзитетот Аризона во државата Вашингтон, пренесува Дојче Веле.
Овие напади исто така можат да се одвиваат длабоко во позадината и не се ограничени на непосредна линија на фронтот. Но, напади врз цивилно население не се дозволени. Со меѓународното право се покриени и напади врз територијата под руска окупација, како што е полуостровот Крим, кој правно ѝ припаѓа на Украина, исто како и врз бродовите на руската воена морнарица во Црно Море.
Со кое оружје Украина смее да напаѓа цели во Русија?
Во принцип, допуштена е употреба на сите соодветни оружја, дронови, ракети, авиони, крстосувачки проектили. Меѓутоа, постојат политички договори меѓу украинското раководство и сојузничките држави, да не се користи оружје од западно производство за напади длабоко во позадината. Членките на НАТО стравуваат дека Русија тоа би можела да го искористи како изговор за натамошна ескалација на војната.
Шефот на американскиот генералштаб Марк Мили во мај изјави дека постои јасен договор оти американско оружје нема да биде користено на руска територија.
„Ова е украинска војна. Тоа не е војна меѓу САД и Русија. Не е војна меѓу НАТО и Русија, ова е војна меѓу Русија и Украина. Ние поддржуваме и опремуваме, помагаме, советуваме и обучуваме. Но, ова не е наша директна војна со Русија.“
1 милијарда долари во домашно производство на беспилотни летала
Украина вети дека нема да користи оружје доставено од Запад на руска територија. Ефектот на домашното производство беше зголемување на нападите во Русија. Видео-анализата на Тајмс за таквите напади со беспилотни летала покажа дека Украина лансирала двојно повеќе беспилотни летала камикази во Русија помеѓу мај и јули отколку во цела 2022 година.
Како што објави Анадолу, Украина кон крајот на Јули ги објави плановите да инвестира 40 милијарди украински гривни (околу 1 милијарда долари) во домашно производство на беспилотни летала оваа година.
„Ги елиминиравме царинските бариери за увоз на резервни делови и комплетни комплети. Уделот во профитот на производителите на UAV (беспилотни летала) е зголемен на 25%, а донесена е одлука која ќе го олесни масовното производство на муниција за беспилотни летала, вели во изјавата на Фејсбук премиерот Денис Шмихал.
Драган Мишев
