Денес во Центарот на Скопје, свечено се отвори „Алејата на Украина“, на која беше организирана изложбата на фотографии која го демонстрира уништеното културно наследство на Украина.
На отварањето, Амбасадорката Украина во Северна Македонија, Лариса Дир, во своето обраќање истакна дека заедно со Општина Центар и Здружението на Украинците „Лесја Украинка“, денес, по повод Денот на Независноста на Украина, се отвора „Алејата на Украина“ во срцето на Скопје.
Според амбасадорката, ова е исклучително важна поддршка на нашата држава од страна на македонското општество, особено за време на вооружената агресија на руската федерација против Украина.
Војната веќе одзема многу животи од нашата држава, животи на деца, војници, волонтери, цивили,… Украина продолжува херојски да го брани не само сопствениот територијален интегритет и суверенитет. Украина, украинските војници и обичните луѓе во Украина ги бранат европските и универзалните човечки вредности по цена на сопствениот живот, истакна Амбасадорката Дир.
Амбасадорката нагласи дека Русија, државата терорист, ја продолжува својата крвава напаѓачка политика, продолжува да бомбардира цивилна инфраструктура, трговски центри, болници, железнички станици, цркви, училишта и градинки, да го уништува културното наследство на украинскиот народ.
Северна Македонија ја поддржува и ѝ помага на Украина во сите можни сфери. Вие сте наши сигурни пријатели и сојузници, ние заедно со вас се бориме за демократската иднина на светот, кажа Амбасадорката.
Таа се заблагодари на Општина Центар, на македонскиот народ и на патриотското здружение на Украинците.
Украинската амбасадорка ги покани присутните по завршувањето на официјалниот дел да се запознаат со фотографиите од злосторствата на русија против Украина, а поточно, да погледнат фотографии од уништеното културно наследство на украинскиот народ.
Фотографиите ги покажуваат последиците од погодените од страна на руски ракети и руски авиони цркви, училишта, спортски терени, библиотеки, болници. Некогаш просперитетните градови сега се претворени во руини. Но, ние ќе ги обновиме, ќе издржиме, ќе победиме. Слава на Украина!На Хероите слава!, кажа на крајот од своето обраќање Амбасадорката Украина Лариса Дир.
На следниот линк погледнете ја галеријата на фотографии од настанот.
На следниот линк погледнете го видеото од настанот.
Д.Мишев
