Драган Рашковски, генералниот секретар на Владата и Дамјан Манчевски, министер за информатичко општество денеска одржаа работни состаноци за соработка со претставници на граѓанското општество.
Со цел да воспостави соработка и заедничка заложба за функционален Совет за соработка на Владата со граѓанското општество, Рашковски оствари работна средба со две мрежи на граѓански организации, претставници на ИПА2 механизмот и на неформалната група од 89 организации што минатата година јавно реагираа и имаа забелешки на одделни решенија од одлуката за формирање на Советот, од претходната Влада.
Тој вети дека Владата ќе ја преземе обврската, сериозно да ги разгледа сите ставови и забелешки на граѓанските организации, а преку инклузивните политики што ги спроведува, Советот ќе претставува еден од најважните механизми што ќе ги вклучи граѓанските организации, како коректив и партнер на Владата, во креирање и спроведување политики во интерес на граѓаните.
Истовремено, министерот Манчевски потпиша Меморандум за разбирање со извршниот директор на Центарот за развојни политики „ИДЕАС ДеПо“, Александар Шахов за реализација на активности во областа на инспекциското работење.
Заедничката соработка е дел од проектот „Модернизација на инспекциските служби“, финансиран од американската агенција за меѓународен развој (УСАИД).
Ваквиот однос на двајца функционери, кои не се единствени во низата (на пример, средбите на министерката Мила Царовска со претставнички на Националната мрежа протов насилство врз жените и Платформата за родова еднаквост и на министерот за финансии Драган Тевдовски со синдикатите) ветува многу.
Директното вклучување на граѓанското општество како коректор на новата власт, влегувањето на граѓански активисти во редовите на министерствата, во Собранието, во Владата, но и во партијата СДСМ, вниманието посветено да се чуе и примени мислењето и потребата на граѓанинот, во заложбите во реформските процеси, укажува на потребата да се остане гласен во барањата, идеите и иновативноста во донесувањето на политички одлуки и промени.
Од нивниот однос зависи колку новата Влада, навистина ќе биде и остане реформска и дали граѓанското општество во својата улога на критичар, ќе остане доследно во целост.
