Македонскиот фудбал оди на Европско! Конечно, имаме историски резултат благодарение на нашата репрезентација, на нашите херои. Гордоста и посветеноста победуваат, радувај се народе!, напиша премиерот Зоран Заев на Фејсбук, откако македонската фудбалска репрезенатција со победата во Тбилиси над селекцијата на Грузија, Северна Македонија за прв пат ќе игра на Европско првенство кое ќе се одржи идната година.
Премиерот Заев на неговиот Фејсбук профил објавил и дека на вечерашнава владина седница донесоа одлука од буџетските резерви да ги наградат сите членови на македонската фудбалска репрезентација со по 10.000 евра, за историскиот успех – пласман на Европско првенство.
Претседателот Стево Пендаровски вечерва и честиташе на македонската фудбалска репрезентација за победата во мечот со Грузија, со која се пласираше на Европското првенство.
-Историски успех на македонската фудбалска репрезентација! Браво момци, се гордееме со вас! Одиме на Европско!, напиша Пендаровски на својот фејсбук-профил.
И лидерот на опозициската партија ВМРО-ДПМНЕ, Христијан Мицкоски им ја честита победата на македонските фудбалери.
„Победа вредна 30 години и историски резултат. Честитки за јунаците кои со срце, вложена сила и талент покажаа дека Македонија може големи работи. Македонија ви се поклонува“, напиша Мицкоски.
Министерот за здравство Венко Филипче ги повика граѓаните пласманот на Европското првенство да го слават со почитување на мерките. По победата на нашата фудбалска репрезентација над Грузија, Филипче на својот фејсбук прифил напиша дека ова е голем ден за заслужено славје, но сепак ги замолува граѓаните тоа да биде со почитување на мерките за заштита.
„Возбудата е огромна, но верувам дека ова е само почеток на прославите на успесите на македонската репрезентација“, напиша Филипче.
Но, сепак апелот на Филипче не го испочитуваа граѓаните, по победата на нашата фудбалска репрезентација во центарот на Скопје и во другите градови се масовно се слави.
Мухамед Зекири на Фејсбук напиша: Пандев, Елмас, Адеми, Алиоски, Несторовски, Ристовски, Муслиу, Бејтулаи, Велковски, Николов, Димитриевски, Барди… #СонотСтанаРеалност.
По победата честитки стигнаат од сите страни…
Дехран Муратов
