Британскиот министер за одбрана Бен Валас во средата ја отфрли идејата за укинување на голем број санкции за Русија во замена за отворање хуманитарни коридори за извоз на жито од украинските поморски пристаништа
За време на неговиот состанок со неговата шпанска колешка Маргарита Роблес, тој ја повика Русија „да ја направи вистинската работа“ и да дозволи Украина да го извезува своето жито низ зелениот коридор за да им помогне на земјите каде недостигот на жито може да предизвика глад, , пишува Ројтерс.
„Тоа жито е за сите, Либија, Јемен, луѓето ширум светот се потпираат на тоа жито за да се прехранат“, рече Валас. „Ја повикувам Русија да ја направи вистинската работа во духот на хуманоста и да го пушти житото на Украина надвор, да престане да го краде житото за свои средства. Да не зборуваме за санкции, да ја направиме вистинската работа.
Рускиот заменик-министер за надворешни работи Андреј Руденко рече дека земјата е подготвена да обезбеди хуманитарен коридор за бродовите што превезуваат храна да ја напуштат Украина, во замена за укинување на некои санкции, објави новинската агенција Интерфакс.
Во исто време, Валас го поздрави предлогот на црноморските земји, како што е Турција, да ги придружуваат пратките со жито од Украина, откако Москва ја отфрли вмешаноста на западните сили.
Украина очекува овогодинешната реколта да биде околу 70% од минатогодишната жетва, бидејќи некои полиња сега се под руска контрола или минирани.
Претседателот Володимир Зеленски претходно изјави за време на онлајн состанок во Украинската куќа во Давос дека светската деловна и политичка елита треба да вложи напори да ги извлече од земјата 22 милиони тони жито заглавени во Украина, со што ќе се спречи гладот во голем број земји.
Говорејќи на Светскиот економски форум, претседателката на Европската комисија Урсула фон дер Лајен рече дека Руската Федерација, која го блокира украинското жито во украинските пристаништа и ги продолжува непријателствата на полињата во Украина, ја уценува меѓународната заедница заканувајќи се со глад во цели региони. Таа потсети дека денес руската артилерија намерно гранатира складишта за жито низ цела Украина. Руски воени бродови го блокираат транспортот на Украина со жито и сончоглед во Црното Море. Последиците од овие срамни дела се очигледни за сите, истакна таа, бидејќи глобалните цени на пченицата вртоглаво пораснаа, погодувајќи ги најранливите нации.
Подготви: Д.Мишев
