Денес, во просториите на Министерството за надворешни работи се одржа инаугуративен состанок на Стратешкиот совет за надворешна политика. На состанокот, воведно обраќање имаше министерот за надворешни работи Бујар Османи кој ги претстави целите на воспостувањето на ова советодавно, експертско тело во рамки на стратешкиот проект на МНР – “Рефлексија 2030”.
Меѓу 26-те членови на Стратешкиот совет за надворешна политика, како советодавно тело на Министерството за надворешни работи што денеска го објави министерот Бујар Османи се и Валентина Божиновска и Срѓан Керим. Османи имаше состанок со членовите на кој кажа дека има имиња со различни мислења и токму тоа е важно за овој Совет да чуе различни идеи и ставови.
Срѓан Керим е еден од двајцата осомничени во случајот на СЈО за пропаднатата Медиа принт Македонија, a Валентина Божиновска е позната по тоа што после изборите 2016 година, рече дека тоа ќе биде „вечер на ножевите“, што асоцираше на „Ноќта на долгите ножеви“ во 1934 година.
Освен Керим и Божиновска, членови на советот се Марјан Ѓуровски, Нано Ружин, Денко Малевски, Марко Трошановски, Ивана Туфегџиќ, Гордан Горгиев, Лазар Еленовски, Живко Мукаетов, Виктор Габер, Ајдован Адемовски.
„Крајна цел на овој проект е изработка на сеопфатна стратегија која ќе понуди еден поинаков светоглед, збир од различните аспекти, еден вид рефлексија на различни леќи, заснован врз инклузивност и партиципативност на сите релевантни општествени чинители. Внимавав да добиеме широка општествена интелектуална и експертска претставеност. Не се ограничив да поканам и поединци кои имаат цврст и јавен политички став, но кои во исто време се ослободени од притисокот на дневната политика“, изјави Османи.
ЦИВИЛ, пред почетокот на вториот јавен настан на тема „Говорот на омразата во политиката“, излезе со остра реакција на оваа одлука на министерот Османи. „Божиновска ќе остане запаметена по говорот за долгите ножеви по изборите во декември, 2016 година, додека Керим по разорното дејство врз медиумите во времето кога беше во позиција тоа да го прави“ – рече Џабир Дерала, во својата изјава во живо.
Б. Ј.
