ЦИВИЛ Медиа вчера го разобличи начинот на кој се „палеше“ бугарското знаме на социјалните мрежи.
Денеска на ред е „нов тренд“ каде лажни профили, овој пат претставувајќи се како дел од структурите на СДСМ, „уринираат“ по бугарското знаме.
На Фејсбук вчера е формирана лажна страница, со вчерашен датум, 20 ноември, ОО СДСМ Нагоричане, на која се објавени фотографии на човек свртен со грб како уринира на знамето на Бугарија со коментар: „За клетите Бугарски Фашисти! Кркајте вето сега“.
Вистинската Фејсбук страница всушност е О.О СДСМ Нагоричане, кои веднаш ја демантираа оваа вест.
„Почитувани, се појави ЛАЖНА фан страна со слично име на нашата фан страна на општинската организација на СДСМ Старо Нагоричане, на која се постираат лажни содржини и фотографии кои се навредливи и шират омраза. Најостро ги осудуваме и се оградуваме од тој профил и апелираме надлежни институции да реагираат“, велат од О.О. СДСМ Нагоричане.
Фејсбук страницата на Бојкотирај Северна Македонија (со пречкртано Северна Македонија) го искористи моментот за да го „промовираат“ овој чин на местење на партијата на власт, СДСМ.
И официјално СДСМ го осуди ваквото злоупотребување и создавање на дезинформации: Срамно и штетно манипулирање од структурите на ВМРО-ДПМНЕ кои не и посакуваат добро на македонската иднина! Преку лажни профили очајно се трудат да пласираат лажни вести и да шират говор на омраза, но веднаш се разобличени! Нема да успеат обидите на очајникот Мицкоски и неговото ВМРО-ДПМНЕ да создадат раздор и нетрпение. Апелираме до граѓаните, да продолжат да ги отфрлаат овие губитнички и назадни политики и однесувања на противниците на македонската интеграција.
„Се работи за метод на создавање на дезинформации што не го гледаме за првпат. Начинот на ширењто упатува на истите центри на моќ, кои беа активни и за време на референдумот, и за време на изборите, и кои редовно се „вклучуваат“ при вакви деликатни ситуации каква што е во моментот таа со Бугарија. Овие објави не се случајни, туку намерно осмислени и злонамерни, бидејќи и по очигледните деманти и разоткривања, се шират и понатаму. Се работи за сили кои се против евроатлантските интеграции на Северна Македонија, и кои постојано потпалуваат тензии внатре во земјата, делејќи ги граѓаните по секакви основи, но и потпалување омраза кон соседите. Во случајов, целта е двојна – и дискредитација на напорите на владејачката партија за смирување на тензиите со Бугарија, но и нашите соседи чие достоинство се повредува“, изјави Петрит Сарачни, медиумски експерт од ЦИВИЛ.
Да потсетиме, ЦИВИЛ, како организација која во континуитет се бори против лажните вести, говорот на омраза и дезинформации, особено во времето на предвремените парламентари избори во јули, со соочи со истото вакво лажно профилирање. ЦИВИЛ беше жртва на лажно претставување, со лажни профили на ФБ и Твитер, како резултат на јавното разобличување на профилите наменски креирани за ширење говор на омраза и лажни вести.
Ист таков случај е забележан и со Борјан Јовановски, а твитерџии често ги менуваат своите прекари за да објавуваат лажни вести во име на познати политичари.
За вчерашната објава со палењето на знамето ЦИВИЛ Медиа побара одговор од МВР дали ќе реагираат и ќе спроведат истрага за пронаоѓање на лицата кои го запалија знамето на Бугарија, но не добивме одговор до моментот на објавување на содржината. На листата на барање одговори го додаваме и ова ширење на дезинформации.
Биљана Јордановска
