Во Косово вчера се одржаа предвремени парламентарни избори, на кои право на глас имаа 1.999.024 граѓани.
Според прелиминарните резултати, победник на изборите е ЛВВ на Албин Курти, со освоени над 49 проценти од гласовите.
ЦИК соопшти дека процесот се одвивал мирно и без сериозни инциденти.
Излезноста на гласачите била 45 проценти.
Со пребројани речиси сите редовни гласови, ЛВВ освои 49,30 проценти, по што следуваат Демократската партија на Косово со 21,01 процент, Демократската лига на Косово со 13,59 проценти и Алијансата за иднината на Косово со 5,68 проценти. Во меѓувреме, Српска листа – блиска до Белград – освои 4,74 проценти од гласовите.
Предвремените парламентарни избори – на кои им претходеа месеци судири меѓу политичките партии, институционални блокади и поларизирачка реторика – завршија со убедлива победа на Движењето Ветевендосје.
Политичките набљудувачи проценуваат за Радио Слободна Европа дека изборите на 28 декември ѝ донесоа на партијата на актуелниот премиер, Албин Курти, „спектакуларна“ победа, која ја постигна главно благодарение на „слабостите“ на опозициските партии.
Ветевендосје освои 49,30 проценти од гласовите, не сметајќи ги условните гласови и гласовите од дијаспората, според прелиминарните резултати од Централната изборна комисија (ЦИК).
„Ова е спектакуларна победа за Движењето Самоопределување, која опозицијата ѝ ја даде со целосен недостаток на идеи за тоа како да се справи со моќниот популизам на Курти“, нагласува аналитичарот Артан Мухаџири за РСЕ.
Прелиминарните податоци на ЦИК покажуваат дека опозициските партии заостануваат далеку.
Демократската партија на Косово (ПДК) освои 21,01 процент од гласовите, Демократската лига на Косово (ЛДК) 13,59 проценти, а Алијансата за иднината на Косово (ААК) 5,68 проценти.
Социјалдемократската иницијатива, со само 1,72 проценти од гласовите, не успеа да го премине изборниот праг.
Српската листа, најголемата партија на косовските Срби, освои 4,74 проценти од гласовите.
Политикологот Дритеро Арифи ја гледа победата на Ветевендосје како резултат на неколку меѓусебно поврзани фактори – „моќната пропаганда“ што ја има оваа партија, како и слабостите на опозициските партии, кои не успеаја да бидат доволно активни и да презентираат експертиза.
„Најважно е што граѓаните го забележаа недостатокот на лидерство во опозициските партии, како и личност која би можела да ја промени ситуацијата“, нагласува Арифи за РСЕ.
Врз основа на прелиминарните резултати, се очекува ЛВВ да има 56 места во Косовското собрание, ПДК 23 места, ЛДК 15 места и ААК 6 места.
Движењето „Ветевендосје“ е на добар пат да го повтори или надмине резултатот од изборите во 2021 година, кога освои 50,28 проценти од гласовите.
Во тоа време, тоа создаде парламентарно мнозинство без коалиција со други албански партии, туку само со пратеници од несрпските малцинства, на кои им се загарантирани и 10 места во Собранието.
Лидерот на Движењето „Ветевендосје“, Албин Курти, по објавувањето на прелиминарните резултати од страна на ЦИК, изјави дека „колку побрзо се потврдат резултатите од изборите, толку побрзо ќе се воспостават институциите“.
Тој ги покани другите партии да соработуваат по меѓународни договори, велејќи дека овој чекор ќе биде тест за можна понатамошна соработка, вклучително и по прашањето за избор на претседател на земјата напролет.
Д. Т.
