БЕЗ ФИЛТЕР е видео колумна на Џабир Дерала во која се коментираат актуелните настани и процеси во земјата и во светот. Првата видео колумна беше објавена на 30 април, под наслов „Зошто ДУИ и ВМРО-ДПМНЕ се против реактивирање на Собранието?“.
Најчести ликови кои во изминатите 14 изданија беа пуштени „низ филтерот“ на Дерала се Христијан Мицкоски и Наќе Чулев. Така, и последните две видео колумни ги носат насловите „Прашања до Мицкоски за случајот „Теретана“ и други возбудливи теми“ и „Итни прашања за Наќе Чулев“.
Најмалку три пати неделно, авторот ги коментира настаните и личностите на денот или се осврнува на одредени појави во општеството, како што е говорот на омразата, во видеото под наслов „Политичка победа во име на омразата и насилството е пораз за сите“.
Изборите се неодминлива тема, па така, еден од насловите на видео колумната е „Избори во јуни!“, а некои од видеата се занимаваат со изборите во контекст на коронавирусот, како што се: „Дали гласањето ќе биде ризик за здравјето? Па, се разбира дека НЕ!“ или „Кој и зошто промовира ризично однесување во однос на коронавирусот?“.
Видеата се објавуваат во СЛОБОДНА ЗОНА, во посебна рубрика БЕЗ ФИЛТЕР, на интернет порталот ЦИВИЛ МЕДИА, а може да се најдат и во посебна плеј листа на видео каналот на ЦИВИЛ. Речиси сите се објавени и на заедничката Фејсбук страница на организацијата и порталот. Нивното преземање е регулирано со Условите за користење, авторски права и заштита на приватноста.
Видео колумните брзо го привлекоа вниманието на публиката, а секако и на партискиот агитпроп што е познат по застапување на радикални, националистички и антизападни гледишта. Видео колумните се личен став на авторот.
Редакцијата ги повикува посетителите на интернет порталот да продолжат да сугерираат теми, да коментираат и да ги споделуваат видео колумните, а секако и да направат свое видео. Сите видео и текстуални прилози ќе бидат објавени без цензура, се разбира, доколу не содржат говор на омраза, лажни вести и клевети. Ви благодариме на поддршката.
Редакцијата
ЛИНКОВИ