Колку и да не е вистина, нека звучи убаво. Кажи ѝ го на рајата она што сака да го слушне. Некои ова го викаат популизам, но што да прави вицепремиерот Александар Николоски кога вакви алегории му се јавуваат насон. И откако ќе се разбуди утоп мокар, истите решава да ни ги раскаже. А можеби преку сонот ја гледа иднината која допрва ќе се оствари, или пак преку сонот отвара некој прозорец од паралелна димензија, дистопија во која Македонија повторно е цела, и економски лидер во Европа и светот, а не на четврто место како што му се сонило на Мицко.
Во последното споделување на своите в(л)ажни сновиденија со јавноста, Николоски објави дека за време на неговиот престој во Лондон, околу 20 мај, сериозно разговарал со некого (!?), Велика Британија да ослободи три категории на граѓани од вадење визи, што ќе покрие околу 80 проценти од населението.
Оние кои бараат влакно во јајцето, реагираа дека неговата објава се коси со изјавата на амбасадорот на Обединетото Кралство во земјава, Метју Лосон, кој во ексклузивно интервју за еден портал на 16 јуни, признава дека постои силен интерес за визна либерализација од македонските граѓани, но објасни дека миграцијата е врвен приоритет за британските гласачи и дека во моментот не постојат услови за олеснување.
Па добро бре луѓе, човекот ви го раскажа толкувањето на својот сон кој го имал за време на престојот во Лондон, за кој верува дека може да се оствари.
Подолг период видовитоста на Николоски канализирана преку неговите соништа, останува непризнаена. Исто како кога во 2022 година, при гостувањето во емисијата „Заспиј ако можеш“ на Алфа, Николоски се пофали дека испратил суштински битни пораки за земјава во Стразбур и дека за тоа бил награден со аплауз од скоро цела сала.
И веднаш му извадија снимки од Стразбур покажуваат дека по говорот на Николоски не следи никаков аплауз во полупразната сала, туку само едно незаинтересирано „Благодарам, Александар“ од спикерот, не знаејќи дека сето тоа Николоски го видел додека сонувал со отворени очи за време на седницата, а самиот говор го држел додека бил во состојба некаде помеѓу сонот и јавето.
Сонот на Николоски не успеаја правилно да го протолкуваат нити Чешка и Словачка пред четири години, кога излегоа со демант на неговата изјавата дека тој и ВМРО-ДПМНЕ дека работеле со државите од Вишеградската група за да се спречи условот историја да влезе во заклучоците на ЕУ. Еве, доказ дека на Николоски му се остваруваат соништата е што и денес тој и партијата се уште спречуваат условот историја, или било кој друг услов да влезе во заклучоците на ЕУ, спречувајќи воопшто да дојде до отворање на преговорите помеѓу Северна Македонија и ЕУ.
И последново, кога му замерија за изјавата дека ја „следи трасата ( за брзата пруга) работена во поранешна Југославија, буквално во времето на Тито, 1878 година“, прогласувајќи го за аналфабет, а тој само им посочи еден друг тек на историјата, различен од онаа на која ги учеа комуњарите, на која предупреди и Џон Крокодилов во изјава за К15 дека Гоце и Даме 1903 биле кај Тито да му бараат независна Македонија, а овој ги одбил.
Цццц, уште ве лажат комуњарите.
Николоски е момче охриѓанче, а во Охрид има една стара изрека: „Ај мор не кажвај сониња.“
Зиги Фројдовски, професионален толкувач на сонови
