Координаторот на ВМРО-ДПМНЕ во Собранието на Република Северна Македонија, Никола Мицевски, во името на партијата и пратеничката група, денеска излезе со предизвик. Предложија пратениците да имаат само македонско државјанство.
„За да ја прекинеме темата на злоупотребата на темата за бугарските пасоши, наводни на пратениците и функционерите на ВМРО-ДПМНЕ … поднесуваме Предлог на закон за изменување и дополнување на Законот за пратеници. Измените се во два члена, за лицето да биде избрано за пратеник треба да го исполнува условот, покрај другите, да е државјанин само на Република Македонија. Доколку законското решение се донесе во наредниве денови со усогласување во Изборниот законик во наредните триесет дена, ова да важи и за овој пратенички мандат“ – изјави Мицевски на прес конференција во Собранието.
СДСМ излезе со експресен одговор. „СДСМ поддржува пратеници да бидат лица кои имаат единствено македонско државјанство, но тоа да важи и за пратениците од актуелниот пратенички состав“ – соопштија тие.
Својата реакција, СДСМ ја дополнија и со предлогот пратеници да не може да бидат лица кои се осудувани за кражби во други држави, како на пример лицето Антонио Милошоски, односно лица кои со своите незаконски дела го нарушуват имиџот на земјата.
„Сепак, поважно од сѐ, наместо да чека законски измени, пратеникот Антонио Милошоски, како осудено и казнето лице во Германија за кражба, за кого се водат предмети пред македонските судови треба да си даде оставка“ – порачаа од СДСМ.
Иницијативата што ја претстави Мицевски доаѓа по објавата на бугарскиот министер за одбрана, Красимир Каракачанов, во која наведе луѓе со бугарско потекло, чии имиња и презимиња коинцидираат со повеќе актуелни пратеници и функционери на ВМРО-ДПМНЕ.
Џ. Д.
