Пред самиот крај на случајот „Тенк“ во кој обвинети се Никола Груевски, Гордана Јанкулоска и поранешниот помошник-министер во МНР Ѓоко Поповски, за набавката на луксузниот мерцедес од 600 илјади евра, ВМРО-ДПМНЕ денеска излезе со соопштение, критика, на правосудството во Македонија.
„Каков е денеска политичкиот притисок врз македонското судство говори фактот што сосема поинакви аршини се употребуваат во предметите Поткуп и Тенк. Предметот Поткуп во кој обвинет е Зоран Заев, се повеќе од 3 години талка по судовите кои беа обвинети дека биле дел од режим, додека предметот Тенк, каде обвинети се неистомисленици на Заев за не цела година експресно е доведен до финиш“, обвинуваат од ВМРО-ДПМНЕ.
За ваквата судска пресметка во корист на Заев, партијата ги обвинува и медиумите под контрола на СДСМ за искривена перцепција во случајот „Поткуп“.
„Заев во изминатава година откако управува со Република Македонија ја зароби државата и ги злоупотребува институциите. Правото е дерогирано, а правосудниот систем понижен. Ова систематско ништење на државата мора да запре. Државата и граѓаните заслужуваат подобро. Да тргнеме во битка за државата и конечно да ја поразиме оваа ненародна влада која што и се случува на нашата татковина“, се вели во соопштението.
Во меѓувреме, во корист на сенародното добро на Македонија, меѓународниот секретар на ВМРО-ДПМНЕ, Влатко Ѓорчев, за европските прашања и влез во НАТО оствари средба со Вес Мичел, асистент секретар за Европски и Евро-Азиски прашања на САД.
Заклучокот од средба е стратешкото сојузништво и пријателски односи помеѓу Македонија и САД, со желба и надеж таквите односи да се прошируваат и продлабочуваат.
Ѓорчев не ја пропушти и можноста да се пожали за, како што се вели во известувањето на ВМРО-ДПМНЕ, актуелниот и масовен политички прогон, состојбите медиумите, влошените економски индикатори и загрижувачките тенденции во судството, како и назадувањето на државата во поголем број на области.
Во ниту еден од дописите нема, како и обично, коментар за наследството што ВМРО-ДПМНЕ го остави на СДСМ и во правосудството и во други области додека беа на власт, најверојатно водејќи се по максимата на партијата, сѐ што ВМРО-ДПМНЕ изгради, СДСМ растури.
Б.Ј.
