ВМРО – ДПМНЕ, по одбивање на сите поднесени приговори на Државната изборна комисија за вториот круг на локалните избори, излезе со соопштение во кое побара оставка од претседателот на ДИК, Александар Чичаковски.
„Државната изборна комисија и владата на СДС спроведе катастрофални криминални избори, се со цел да го порази ВМРО-ДПМНЕ преку масовен изборен фалсификат. За сево ова најодговорен Чичаковски и токму поради тоа од него бараме итна и неотповиклива оставка“ побараа од ВМРО-ДПМНЕ.
Не изостана и делот дека за тоа се виновни СДСМ со нивното создавање „заробена држава каде стравот е главната алатка на владеење“ и дека целосно е игнориран извештајот на ОБСЕ.
„Сосема е јасно зошто криминалци како Красниќи беа ослободувани пред изборите. Игнорирањето на извештајот на ОБСЕ од страна на владата каде се констатира постоење на таканаречен бугарски боз за време на изборите е потврда дека изборите беа криминални. Според извештајот на ОБСЕ „Резултатите на национално ниво во првиот круг покажаа дека од 922 ливчиња меѓу бројот на подадени гласачки ливчиња и гласачи кои што гласале на изборите за градоначалник”. Извештајот на ОБСЕ ги потврди сомневањата на нашата партија за постоење на изборен инженеринг преку таканаречениот метод на бугарски воз. Од вкупно 3.000 илјади избирачки места на ниво на цела Македонија, со основано сомневање спорни се резултатите од 922 избирачки места. Тоа значи дека во 1 третина од избирачките места СДСМ се потпрело на изборен фалсификат за да дојде до победа“ се вели во соопштението на ВМРО-ДПМНЕ.
Во продолжение, потсетуваат повторно на масовен поткуп и притисоци и улогата на „полицијата на Спасовски“ која наместо да ги решава нерегуларностите била директен учесник во нивно спроведување.
„ДИК замижа пред сите овие нерегуларности и не прифати ниту еден приговор на ВМРО-ДПМНЕ. Ова е доволен доказ дека ДИК на чело со Чичаковски работеше пристрасно со цел прикривање на изборните криминали на СДСМ. Токму поради ова ВМРО-ДПМНЕ бара неотповиклива оставка од претседателот на ДИК Чичаковски кој непрофесионално, пристрасно и целосно неморално ја извршуваше својата функција.
Не можеме да очекуваме непристрасно делување од Чичаковски кој не пропуштал ниту еден митинг организиран од СДСМ. Не можеме да очекуваме непристрасно делување од генералниот секретар на ДИК чија сопруга беше втора на листата советници за град Скопје од СДСМ“ соти во соопштението.
