Многу сум благодарен на ЦИВИЛ што ни бевте ветер во грб и ни дадовте целосна поддршка за одржување и спроведување на пописот, истакна директорот на Државниот завод за статистика, Апостол Симовски, на јавениот настан на ЦИВИЛ „Рендгенска снимка на Пописот“.
„Пописот што требаше да се одржи во април се одложи поради закажаните предвремени избори и поради пандемијата. Само 8 попишувачи се заразиле, и само еден државен инструктор се заболе во домашни услови. Имавме 5.000 попишувачи и ги следевме протоколите. Пандемијата за жал се уште трае, и тврдам дека пандемијата можеше да се одржи и во април без да се одложи.
Имавме голем политички притисок во операцијата Попис. Имавме отворена кампања од една политичка кампања за бојкотирање на пописот, но имаше и затворени кампањи против пописот.
Имавме хакерски напади и ни ја кочеја работата, но не успеале да влезат во базата на податоци, беа максимално заштитени.
Вебсајтот ни беше постојано под напад, мејловите ни беа блокирани, хакирани, па баравме други скриени патишта методи за да комуницираме со јавноста.
Попишувачите беа кај сите граѓани, дури поставивме и пунктови за секој кој не бил попишан дома да може да си го оствари своето право да се попише“, истакна Симовски.
Статистиката е алатка за бизнис секторот за правење планови во економскиот дел. Не смееме во иднина да дозволиме да немаме попис толку долго време бидејќи многу губиме како бизнис сектор, вели потпретседателката на Сојузот на стопански комори на Македонија, Габриела Кулебанова.
Таа додава дека без попис бизнис секторот нема да знае каде да вложува, со кој квалификуван кадар се соочува државата.
„ДЗС треба да биде меродавна и вистинска база и да има вредност, точност и тежина. И тие податоци да ни служат за планирање. Ние повикуваме да има базично поврзување меѓу институциите.
Пописот е битна алатка и патоказ за понатаму. Како економисти ќе ги чекаме резултатите од пописот за да не правиме грешки понатаму“, додаде Кулебанова.
Претседателот на ЦИВИЛ, Џабир Дерала истакна дека како невладина организација не може да се аплицира за некој проект ако немаме конкретни бројки.
„Со конкретни бројки добиени од пописот, ќе може да знаеме што да очекуваме од теренот, или на која публика се обраќаме.
На моите колеги од странство тешко им беше да сфатат дека пописот во нашата држава не е само статистичка операција, туку има и политичка позадина. Дел од политичките партии јавно и тајно го попречуваа пописот, за да ја разнишат довербата на институциите. Нападот на статистичкиот процес е всушност да се разнишува довербата во институциите, безбедноста на државата како и меѓуетничката толеранција и соживот.
Ваквите разобличувања на оние кои пробаа да го оспорат и попречат пописот, ќе наиде на оркестриран говор на омраза на социјалните мрежи токму од тие структури кои го бојкотираа пописот“, нагласи Дерала.
Тахири истакна дека водење на позитивна кампања и едукација на граѓаните за придобивките од пописот беше неизбежно бидејќи пописот беше нападнат со многу дезинформации и бојкот.
Симовски истакна дека сака бизнис секторот да биде нивниот главен корисник.
„Може да бидете најдобриот готвач на светот, но ако немате продукти не може да направите добро и вкусно јадење. Исто и во бизнис секторот може да биде некој многу успешен, но ако нема податоци не може да функционира.
За жал нашата земја не произведува статистичари во текот на образованието. Користењето на точни податоци е ланец за успешни политики во сите сектори. Замислете да градите училиште таму каде што нема деца, и обратно, тоа се за џабе фрлени пари. Затоа се битни податоците.
Ние постоиме заради другите, а не другите заради нас. Ние мораме да бидеме отворени и транспарентни. Ви благодарам на ЦИВИЛ за поддршката и како медиум и како невладина која постојано објавувате точни информации за пописот“, нагласи Симовски.
Дерала нагласи дека од ова статистичка операција треба да се извлечат заклучоци дека општеството и државата мора да бидат поотпорни на дезинформациите и хакерските напади. Информациите треба да бидат вистинити и веродостојни и институциите да бидат поотпорни на политички влијанија и притисоци.
Како се спроведе, кои беа предизвиците и кои се перспективите на пописот на населението 2021? – е главното прашање на кое одговораа директорот на Државниот завод за статистика, Апостол Симовски, потпретседателката на Сојузот на стопански комори на Македонија Габриела Кулебанова и претседателот на ЦИВИЛ, Џабир Дерала. Настанот го модерираше Дијана Тахири од ЦИВИЛ.
Настанот е дел од проектот „Граѓански објектив“ кој ЦИВИЛ го спроведува со финансиска поддршка од Националната фондација за демократија (National Endowment for Democracy).
Д.М.