Српскиот претседател Александар Вучиќ, како дел од новите мерки за граѓаните, најави зголемување на пензиите, минималните плати и платите во здравството и образованието, пренесува РСЕ.
Меѓу мерките е и новиот закон „Свој на своето“, чија цел е легализирање на 4,8 милиони згради кои немаат регистрирани права или дозволи за користење.
Обраќајќи се до јавноста од Палатата на Србија, Вучиќ најави зголемување од 5 проценти на платите во здравството и образованието од 1 октомври.
Како што изјави, платата на лекарите специјалисти ќе биде 1.440 евра, а на медицинските сестри ќе биде 778 евра, додека наставниот кадар со седми степен на стручно образование – едукатори, наставници, професори во основните и средните училишта ќе имаат 969 евра.
View this post on Instagram
Исто така, беше објавено дека пензиите ќе се зголемат за 12,2 проценти од 1 декември, така што просечната пензија ќе изнесува 485 евра.
Планирано е вонредно зголемување на минималната плата од 9,4 проценти од 1 октомври, како и дополнително зголемување од 10,1 процент од 1 јануари.
„За прв пат во историјата на Србија, ќе имаме минимална покриеност на потрошувачката кошничка не од 100 проценти, туку од 111 проценти“, тврди Вучиќ.
Една од мерките се однесува на легализација на 4,8 објекти во земјата преку најавениот закон „Свој на своето“.
Како што е најавено, новиот закон ќе овозможи легализација преку едноставна постапка преку дигитална апликација и со минимални трошоци.
Според зборовите на претседателот на Србија, максималната цена за легализација во селата за семеен објект со градина до 500 квадратни метри ќе биде 100 евра, во градови како Нови Сад, Ниш, Крагуевац, за приградските населби ќе биде максимум 200, додека во центарот на градот ќе биде до 500 евра.
Цената за престижни локации во Белград, на пример за стан од 200 во Терезија, ќе изнесува 1.000 евра.
Мерките на државата, кои се најавуваат дека се во корист на граѓаните, се донесуваат во време на масовните антивладини протести што ја тресат Србија веќе десет месеци.
Учесниците на протестот инсистираат на одговорност на властите за смртта на 16 лица при падот на бетонскиот настрешник на реновираната Железничка станица во Нови Сад и бараат вонредни парламентарни избори.
Најавени се и измени на Уставот во областа на извршната постапка, за да не можат извршителите да им го одземат просторот за живеење, станот или куќата на луѓето на кои тоа им е единствен дом.
Д. Мишев
