„Продолжената политичка неизвесност го зеде својот ‘данок’ врз економскиот раст, преку страдање на инвестициите поради слабите одлуки. Формирањето на новата Влада означи важна пресвртница. Политиките сега треба да се фокусираат на обновата на баферите за фискална политика и спроведувањето на критичните реформи за повторно оживување на растот и да се направи нов притисок кон изгледите за пристапување кон ЕУ“, се вели во завршната изјава на Мисијата на Меѓународниот монетарен фонд.
Мисијата на Меѓународниот монетарен фонд, во вчера објавениот годишен преглед на македонската економија, изготвен од 6 до 18 септември, најави дека очекува инфлацијата во 2017 да достигне 1,2 отсто, со што ќе заврши тригодишната дефлација. Мисијата ја поздравува намерата на Владата да го зајакне управувањето со јавните финансии и да ја зголеми фискалната транспарентност, а банкарскиот систем го оценува како здрав.
Според Извештајот, среднорочната перспектива е поволна во зависност од континуираната политичка стабилност и силната надворешна побарувачка: „Реалниот раст на БДП се очекува одново да се врати на повисоко ниво во 2018 година и постепено да се зголеми на 3,75 отсто на среден рок, поддржан од подобрените одлуки од страна на инвеститорите, проширените извозни капацитети и континуирано подобрување на условите на пазарот на трудот. Ризиците во однос на изгледите се во надолна линија“.
Мисијата на ММФ смета дека во отсуство на трајни мерки за консолидација, се очекува фискалниот дефицит и јавниот долг да порасне.
Спорд Извештајот, подобрувањето на среднорочниот потенцијал за раст зависи од решителното справување со слабостите на судството и сеопштото управување.
Тимот на ММФ кој ја посети Македонија, се сретна во Министерството за финансии, со тимот на чие чело беше министерот Драган Тевдовски, како и со гувернерот на Народната банка, Димитар Богов.
Опозициската ВМРО-ДПМНЕ, пак, паралелно со оценките на ММФ, реагираше дека „катастрофалната економска политика на СДСМ ја води Македонија кон економски крах и банкрот. Сè повеќе граѓани ја губат надежта дека Владата на СДС ќе постигне било какви економски резултати. Македонија со оваа бандитско криминална влада ќе го достигне дното. Цехот ќе го платат граѓаните“.
ВМРО-ДПМНЕ ја обвини Владата на СДСМ дека не е фокусирана на отворање на нови работни места, дека „ги брка потенцијалните инвеститори и компаниите кои досега инвестираа, неводејќи грижа дека без работа можат да останат 25.000 граѓани“, дека со падот на извозот за јуни и јули од 12%, му е нанесена голема штета на домашното стопанство, како и дека „неодговорното работење на СДС со народните пари на Република Македонија за прв пат по подолг период и донесе пад на просечната плата за 0.7% и пад на индустриското производство 2,2%“.
