Над 70 организации и поединци од Западен Балкан и ЕУ упатија Заедничко барање до лидерите на ЕУ и ЗБ6 да ги отстранат бариерите со кои се ограничува слободата на движење на граѓаните на Западен Балкан во Шенген зоната и регионот.
Меѓу потписниците за либерализација на визниот режим во земјите на Западен Балкан е и ЦИВИЛ.
„Ние, долупотпишаните организации и поединци од Западен Балкан и Европската унија ги повикуваме владите на ЗБ6 и лидерите на земјите членки на Европската унија итно да постапат кон укинување на визниот режим и кон воспоставување слобода на движење за сите граѓани на Западен Балкан кои патуваат во регионот и низ целиот Шенгенски простор.
Постоечките пречки за слободно движење во регионот и низ целиот Шенгенски простор нарушуваат семејни врски, штетат на бизниси, ограничуваат студентски и академски размени и спречуваат регионална соработка и развој.
Движењето на граѓаните на ЗБ6 внатре во регионот и понатаму е предизвик поради пасошки ограничувања, како што е случајот со патување помеѓу Косово и Србија, како и помеѓу Босна и Херцеговина и Косово. Владите треба да разберат дека патиштата, тунелите и железниците нема во целост да им служат на земјите на ЗБ6 доколу одредбите не го олеснуваат слободното движење на луѓе, стока или услуги во регионот.
Слично, можностите за граѓаните од ЗБ6 се многу поограничени кога се работи за придонес или придобивки од регионални проекти, но исто така за поголеми ЕУ програми кои се покажале корисни за студенти, истражувачи и млади претприемачи – како што е програмата Еразмус+– што нуди значајни искуства за ЕУ граѓаните. Кога постојат вакви можности, тие имаат тенденција да бидат достапни само за луѓето во регионот на Западен Балкан чии пасоши им дозволуваат да патуваат полесно, без да се поминува низ долгите и скапи процедури на вадење Шенген виза.
Пасошките ограничувања и визните режими во рамките на регионот се значајни пречки што мора итно да се решат. Претстојниот Самит на Западен Балкан во Берлин претставува значајна можност за укинување на визниот режим и овозможување слобода на движење во регионот.
Истражувањето на потенцијалот на човечкиот капитал во рамките на Берлинскиот процес беше од суштинско значење, што овозможи вклученост на младите и граѓанското општество како промотори на општествени промени и кој се смета како инвестиција во мобилноста на луѓето. На поддршката на ЕУ често ѝ недостасува овој социјален аспект, што може да има значајно и одржливо влијание врз граѓаните и општествата.
Визната либеризација во полза на петте земји на Западен Балкан од 2009 година, беше најголемиот поттик за економскиот развој на регионот. По воведувањето на визната либеризација за Западен Балкан, трговијата на регионот со ЕУ се зголеми скоро два и пол пати.
Меѓутоа, граѓаните на Косово и понатаму се единствените во регионот на кои им е потребна виза за да патуваат во шенгенскиот простор. И покрај фактот што во 2018 година Европската комисија потврди дека Косово ги има реализирано сите одредници поврзани со визната либеризација, а Европскиот парламент гласаше за предлогот на комисијата, истото сé уште не е решено во Европскиот совет.
ЕУ треба да преземе одговорна улога и да го зачува својот кредибилитет во регионот по пат на исполнување на своите ветувања дадени на косовските граѓани и да додели визна либеризација на Косово оваа година. Со доделување визна либеризација на сите граѓани на регионот на Западен Балкан, ЕУ би си го исполнила своето ветување и би ја исполнила својата основна вредност – слобода на движење.“, пишува во повикот.
